Xiaomi kompaniyasi bosh direktori Ley Szyun 3-fevral, chorshanba kuni Weibo ijtimoiy tarmog‘idagi sahifasi orqali foydalanuvchilarga murojaat qilib, tez orada juda qimmat smartfon ishlab chiqarilishiga shama qildi, deb yozadi IXBT.
Shuningdek, u Xiaomi ixlosmandlarining bu boradagi fikrlariga ham qiziqish bildirgan.
“Agarda Xiaomi 1,5 ming dollarlik yuqori sifatli mobil telefonni ishlab chiqarganida, xarid qilgan bo‘larmidingiz? Agarda siz 1,5 ming dollardan qimmat smartfonni taqdim etmoqchi bo‘lganingizda, u qanday ko‘rinishda bo‘lardi? Izohlarda o‘z fikringiz bilan bo‘lishishga tortinmang”, — deb yozadi Ley Szyun.
Ma’lum qilinishicha, odatda Xiaomi bu kabi so‘rovlarni loyihalash boshqichida emas, balki bevosita tayyor mahsulot anonsi oldidan o‘tkazadi. Shu sababli bu qadar qimmat telefon taqdimotga tayyor holda deb taxmin qilish mumkin. Mish-mishlarga ko‘ra, Xiaomi o‘zining egiluvchan ekranga ega birinchi smartfonini taqdim etishi lozim, bu kabi narxi raqobatchilarning qaroriga ancha mos keladi.
Avvalroq AQSh va Xitoy o‘rtasidagi savdo urushi biroz tinchlanganiga qaramay, sanksiyalar ro‘yxatidan yana 9 ta kompaniya, xususan, Xiaomi ham o‘rin olgani to‘g‘risida xabar berilgandi. “Qora ro‘yxat”ga tushish amerikaliklarning ushbu Xitoy kompaniyalariga sarmoya kirita olmasligi va ularda ulushi bo‘lmasligini bildiradi. Taqiq 2021-yil 11-noyabrdan kuchga kiradi, bu vaqtga qadar investorlar o‘z aksiyalarini sotib yuborishi kerak.
Izoh (0)