Дональд Трамп тарафдорлари орасида оммалашган Parler ижтимоий тармоғининг ижрочи директори Жон Матце компаниядан ҳайдалди. Бу ҳақда Матценинг Parler компанияси ходимларига ёзган хатига асосланиб Meduza хабар берди.
Матценинг айтишича, Parler кенгаши уни 29 январь куни ишдан бўшатган.
«Сўнгги бир неча ой ичида маҳсулотимизга бўлган қарашим, сўз эркинлигига нисбатан кучли ишончим ва Parler’ни қай тарзда бошқариш истагим сабабидан доимий қаршиликларга учраб келдим. Мен Parler’ни ишга тушириш учун тун-у кун ишлаб, унинг учун доим курашиб келганман, аммо энди тармоқнинг келажаги менинг қўлимда эмас».
Reuters билан суҳбатда Матце хат мазмунини тасдиқлади. Унга кўра, Parler’ни ҳозир икки кишилик ижроия қўмитаси бошқармоқда.
Parler 2018 йилда ташкил этилган ва ўзини цензурасиз Twitter сифатида танитган. АҚШдаги 2020 йилги президентлик сайловларидан сўнг, у америкалик ўнг қанот фаоллар орасида машҳурликка эришди ва бир мунча вақт Америка App Store’да энг кўп юклаб олинган дастур бўлди.6 январь куни АҚШнинг ўша пайтда амалда бўлган президент Дональд Трампнинг тарафдорлари Капитолийга бостириб киргандан сўнг, Apple ва Google Parler’ни ўзларининг дўконларидан олиб ташлади. Ижтимоий тармоқлар учун хостинг хизматларини кўрсатувчи Amazon ўз серверларидан Parler’ни узишни эълон қилди.
Капитолийга бўлган ҳужумдан сўнг ўзи ва оиласига нисбатан таҳдидлар бошлангач, Жон Матце яшаш жойини ўзгартиришга мажбур бўлди. Parler Россия хостинггига ўтказилди.
Эслатиб ўтамиз , январь бошида Дональд Трампнинг Twitter’даги шахсий аккаунти — @realДональдTrump зўравонликни янада қўзғатиш хавфи юқори бўлгани сабабли бутунлай блокланганди.
Аввалроқ Ҳиндистон ҳукумати 1 февраль куни мамлакатдаги намойишлар фонида 250 га яқин ҳинд аккаунтини блоклагани ҳақида хабар берилганди. Ҳукумат саҳифаларни зўравонликка даъват этаётганида айблаган.
Изоҳ (0)