Маҳаллий ўзини ўзи бошқариш масалалари бўйича Украина Олий Радаси қўмитаси Донецк вилояти Бахмутск туманидаги Новгород шаҳар типидаги посёлкаси номини Нью-Йорк деб ўзгартириш ҳақида қарор қабул қилди. Бу ҳақда Украина ОАВларига таяниб Meduza хабар бермоқда.
Қарор вилоят маъмуриятининг мурожаати асосида қабул қилинди. Унда таъкидланишича, Нью-Йорк қишлоқнинг тарихий номи бўлиб, посёлка 1951 йилгача шу ном билан аталган.
Қишлоқ номини ўзгартириш тўғрисидаги якуний қарор Олий Радада умумий овоз бериш йўли билан қабул қилинади.
Нью-Йорк аҳоли пунктига меннонитлар (XVI асрда Нидерландияда вужудга келган протестантлик ҳаракати) асос солган. Россияга улар қиролича Екатерина II томонидан таклиф қилинган ва уларни жойлаштириш учун ҳозирги Шарқий Украина ҳудудидан ер ажратилган.
Нью-Йорк номли қишлоқ, хусусан, совет ёзувчиси Виктор Некрасовнинг «Она шаҳрида» («V родном городе») драмасида ҳам тилга олинган.
Ҳозир Новгородда 10 мингга яқин одам яшайди.
Эслатиб ўтамиз, Украинада «Мухолифат платформаси — Ҳаёт учун» партияси раисдоши Вадим Рабинович Олий Рада минбарида туриб, президент Владимир Зеленскийга нисбатан импичмент жараёни бошланишини маълум қилди. Рабинович Владимир Зеленскийни Уй-жой ва коммунал хизматлар тарифлари, COVID-19’га қарши вакцинанинг йўқлиги, тиббиётнинг хароблиги ва бошқа муаммолар ҳақидаги «ҳақиқатни одамларга етказаётган»ларнинг «оғзини ёпиш»да айблади.
Изоҳ (0)