Мексика «Спутник V» вакцинасини етказиб бериш бўйича шартнома имзолади

Мексика Соғлиқни сақлаш вазирлиги раҳбари Хорхе Алькосер Россиянинг Гамалея институти томонидан ишлаб чиқилган COVID-19’га қарши вакцинани Мексикага етказиб бериш бўйича шартномани имзолади. Бу ҳақда «РИА Новости» хабар қилди.

«Кеча соғлиқни сақлаш вазири Хорхе Алькосер ‘Спутник V’ вакцинаси (етказиб бериш) учун шартнома имзолади» – деди соғлиқни сақлаш вазирининг ўринбосари Уго Лопес-Гател матбуот анжуманида.

Таъкидланишича, 25 январь куни Россия президенти Владимир Путин билан телефон орқали суҳбатлашгандан сўнг, Мексика раҳбари унга вакцина партиясини юбориш қарори учун миннатдорлик билдирди ва уни ишлаб чиқишни Россия илм-фани соҳасидаги ютуқ деб атади.

«Спутник V» вакцинаси одамнинг аденовирус векторли платформаси асосида ишлаб чиқилган ва Россия, Беларусь, Аргентина, БАА, Венгрия, Сербия, Боливия, Жазоир, Фаластин, Венесуэла, Парагвай, Тунис ва Туркманистонда рўйхатга олинган. Европа Иттифоқи ва ЖССТда вакциналарни рўйхатдан ўтказиш жараёни бошланди.