Шуҳрат Холдорович Отабоев Президентнинг иқтисодиёт соҳаларини ривожлантириш, инвестиция ва ташқи савдо сиёсатини амалга ошириш масалалари бўйича маслаҳатчиси ўринбосари лавозимига тайинланди. Бу ҳақда Президент матбуот хизмати хабар берди.
Отабоев 2018 йил 14 ноябрдан шу кунга қадар «Ипотека банк» бошқаруви раиси лавозимида фаолият юритиб келаётган эди.
Маълумот учун, Отабоев 1978 йилда туғилган. 2000 йилда Тошкент молия институтини, 2005 йилда Япониянинг Сиёсий фанлар миллий институтини, 2010 йилда Ўзбекистон Президенти ҳузуридаги давлат ва жамият қурилиши академиясини тугатган.
Меҳнат фаолиятини 1995 йил Навоий вилоятидаги 14-ўрта мактабда инглиз тили ўқитувчилигидан бошлаган. 2014−2015 йилларда Марказий банк Молия иқтисод департаменти директори, 2015−2017 йилларда «Халқ банки» бошқаруви раиси ўринбосари сифатида ишлаган.
2017 йил июнидан 2018 йил 14 ноябрига қадар Марказий банк бошқаруви раиси ўринбосари лавозимида фаолият юритган.
Аввалроқ Дилшод Кенжаев Президентнинг ёшлар, фан, таълим, соғлиқни сақлаш, маданият ва спорт масалалари бўйича маслаҳатчиси ўринбосари этиб, Тошкент вилояти ҳокимига Зуҳра Мирғозиева ўринбосар этиб ҳамда собиқ жисмоний тарбия ва спорт вазири Қарши давлат университетига ректор этиб тайинлангани ҳақида хабар берилганди.
Изоҳ (0)