Тошкентни Покистон шимоли билан боғлайдиган Мозори-Шариф—Кобул—Пешавор темир йўли қурилиши ва унинг узунлиги 573 километр бўлиши маълум қилинди. Лойиҳа учун умумий 4,8 миллиард доллар кредит жалб қилинади. Бу ҳақда 2 февраль куни Афғонистон, Покистон ва Ўзбекистон давлатлари ўртасида ўтказилган уч томонлама учрашувда маълум қилинди.
Маълум қилинишича, халқаро молиявий ташкилотлар ҳамда юқори лавозимдаги давлат вакиллари иштирокида ўтган учрашувда темир йўл қурилиши бўйича йўл харитаси имзоланди.
573 километрлик темир йўл Тошкент шаҳрини Кобул орқали Покистон шимолидаги Пешавор билан боғлайди.
Ушбу темир йўл қурилишини молиялаштириш учун Ўзбекистон, Афғонистон ва Покистон раҳбарлари номидан қўшма мурожаат асосида АҚШ Халқаро тараққиёт молия корпорациясининг ва бошқа халқаро молия институтлари маблағлари жалб этилиши ҳақида хабар берилган эди.
Туркиянинг Anadolu агентлиги маълумотига кўра, жалб қилинадиган умумий кредитлар маблағи 4,8 миллиард долларни ташкил қилади.
Лойиҳа учун тегишли ҳужжатларни тайёрлаш 2021 йил июнгача якунланади. Темир йўл қурилиши 2022 йилнинг сентябрь ойида бошланиши режалаштирилган.
Аввалроқ Шавкат Мирзиёев Покистон бош вазирининг маслаҳатчиси Абдул Раззоқ Довудни қабул қилган эди. Маслаҳатчи Афғонистон ҳудуди орқали Марказий ва Жанубий Осиёни энг қисқа йўл билан боғлайдиган, Покистоннинг денгиз портларига чиқишни ва уларнинг инфратузилмаси самарали ишга солинишини таъминлайдиган темир йўл қуриш лойиҳасини илгари суриш тўғрисидаги ташаббус Покистонда юксак баҳоланиб, қўллаб-қувватланаётганини қайд этган эди.
Изоҳ (0)