Тунис Соғлиқни сақлаш вазирлиги «Спутник V» вакцинасини рўйхатдан ўтказди. Бу ҳақда Россия тўғридан-тўғри инвестициялар фонди (РТИФ)га таяниб «РБК» хабар бермоқда.
«Вакцина Россиянинг ‘Спутник V’ вакцинаси клиник синовлари маълумотлари асосида ‘фавқулодда қўллаш’ дастури (emergency use authorization) доирасида рўйхатдан ўтказилди», — дейилади «РБК»га келиб тушган хабарда.
Шундай қилиб, Тунис Россия препаратини рўйхатдан ўтказган Африкадаги учинчи давлат бўлди. Бундан аввал ушбу вакцина Жазоир ва Гвинеяда рўйхатдан ўтказилган.
РТИФ бош директори Кирилл Дмитриев фонд вакцинага бўлган эҳтиёжни қондиришда Тунисга кўмаклашишга тайёр эканлигини билдирган.
Жонс Ҳопкинс университети маълумотларига кўра, Тунисда пандемия давридан буён 206 мингдан ортиқ киши коронавирусга чалингани қайд этилган.
26 январь куни Дмитриев фонд ёрдамида «Спутник V» яқинда дунёнинг 25 мамлакатида рўйхатдан ўтказилишини маълум қилган. Россия тўғридан-тўғри инвестиция жамғармасининг маълумотларига кўра, 30 дан ортиқ давлат Россия вакциналарига қизиқиш билдирган.
Аввалроқ Россия вакцинаси Беларусь, Туркманистон, Сербия, Фаластин, БАА, Аргентина, Боливия, Венесуэла, Парагвайда рўйхатдан ўтганди. Венгрия Европа Иттифоқида биринчилардан бўлиб тезлаштирилган жараён бўйича препаратни рўйхатдан ўтказган.
Изоҳ (0)