Кремль Алексей Навальний иши бўйича суд қарори мамлакатдаги сиёсий вазиятга сезиларли таъсир кўрсатади деб ҳисобламайди. Бу ҳақда «ТАСС» хабар қилди.
«Мамлакатдаги сиёсий вазият жуда кўп қиррали. Мамлакат сентябрь ойида бўлиб ўтадиган парламент сайловларига тайёргарлик кўрмоқда, кўплаб турли жараёнлар бўлиб ўтмоқда, янги партиялар тузилмоқда. Бу жуда кўп қиррали жараён, шунинг учун эҳтимол қандайдир муҳим таъсир ҳақида гапиришнинг ҳожати йўқ», – деди Россия президенти матбуот котиби Дмитрий Песков.
Шунингдек, у Россия президенти Владимир Путиннинг ушбу суд қарорига муносабатини билмаслигини айтди.
«Мен президентнинг ҳар қандай реакциясидан хабардор эмасман. Биласизми, биз анъанавий равишда суд ҳукмлари ва қарорларига ҳеч қандай изоҳ бермаймиз», – деди Песков. Кремль вакили воқеага шахсий баҳо бермаслигини қўшимча қилди.
«Нима бўлганда ҳам, (мен изоҳ бермайман) бу суд қарори, биз шунчаки изоҳ беришга ҳаққимиз йўқ», – деб тушунтирди Песков. Песков Кремль Навальнийнинг 2 февралдаги суд мажлисидаги нутқи билан танишмаганлигини таъкидлади.
«Сиз айтаётган маҳкум (Алексей Навальний) Россия президенти Владимир Путиннинг тарихдаги ролини тавсифлай олмайди, президентга фақатгина рус халқи баҳо беришга ҳақли», – дейди Песков.
Россия президентининг ўзи тарихдаги ўрни ҳақида ўйлайдими ёки йўқми, деган саволга матбуот котиби бу президент муҳокама қиладиган фикрлар эмаслигини айтди.
«Президент ҳар куни ишлайди. Кўряпсизми, қанча муаммолар, қанча долзарб масалалари бор», – деди Песков. Мисол тариқасида у ижобий ва салбий томонларига эга имтиёзли ипотека дастурининг муҳокамасини келтирди. Песковнинг таъкидлашича, бундай мавзулар «схоластикадан мутлақо йироқ, аммо миллионлаб руслар ҳаётига тегишли».
«Бу президент ҳар куни ҳукумат билан қилаётган иши. У бунинг ўрнига маҳкумларнинг баъзи нутқларини тингласа ёки тарихдаги ўрни ҳақида ўйласа, бу аҳмоқлик ҳисобланади», – дея хулоса қилди Кремль вакили.
Эслатиб ўтамиз, Москванинг Симоновский суди 2 февраль куни Жазони ижро этиш федерал хизматининг илтимосига биноан Навальнийни «Ив Роше» иши бўйича 3,5 йилга озодликдан маҳрум қилди. У жазони умумий режимдаги колонияда ўтайди.
Навальний Жазони ижро этиш федерал хизматидан яширинмагани ва Германияда даволангани ҳақидаги ҳимоя позициясини суд ишониб бўлмайдиган деб топди.
АҚШ тезкорлик билан ҳеч қандай шартларсиз сиёсатчи Алексей Навальнийни озодликка чиқаришни талаб қилмоқда. Бу ҳақда мамлакат давлат котиби Энтони Блинкен баёнот билан чиқиш қилган.
«Биз Россия ҳукуматидан яна бир марта тезкорлик билан ҳеч қандай шартларсиз жаноб Навальнийни озодликка чиқаришни сўраймиз. Нафақат у, балки асоссиз равишда ҳибсга олинган бошқа фуқароларнинг ҳам ҳуқуқлари поймол бўлмаслиги керак ва улар сўз эркинлиги, тинчлик йўли билан йиғилишлар ташкил қилишга ҳақли», – деган Блинкен.
Шунингдек, Буюк Британия ташқи ишлар вазири Доминик Рааб ҳам Навальнийни зудлик билан озод қилиш ҳақида баёнот берган.
Мавзуга доир:
Изоҳ (0)