Японияда коронавируснинг «британча» штамми янги ўчоғи аниқланди

Японияда яна беш кишида коронавируснинг «британча» штамми аниқланди. Бу ҳақда Япония Соғлиқни сақлаш, меҳнат ва фаровонлик вазирлиги хабар берди, деб ёзади «РБК».

Беморлар Сайтама ва Токиода қайд этилган бўлиб, улар 40 ёшдан 60 ёшгача бўлган эркак ва аёллардан иборат. Шулардан Сайтамада яшайдиган уч нафари иш бўйича илгарироқ шу штамм аниқланган беморлар билан мулоқотда бўлган. Янги касалланганларнинг барчаси касалхонага ётқизилган.

Буюк Британия ҳукумати коронавирус мутацияси пайдо бўлгани ҳақида 14 декабрь куни маълум қилди. Олимлар янги штамм аввалгиларидан 50—70 фоизга юқумлироқ эканини таъкидлади. Буюк Британия ҳукумати маслаҳатчиси Патрик Валланс маълум қилишича, мутация коронавирус инфекциясидан ўлим даражасини ҳам 30 фоизга оширган.

Япония ҳудудида «британча» штамм биринчи марта 2020 йил декабрь охирларида қайд этилди. Ўшанда мамлакатда беш нафар бемор аниқланган, уларнинг барчаси Британиядан қайтиб келган фуқаролар эди. Айни пайтда Японияда коронавируснинг «британча» штаммини юқтириб олганлар сони 64 кишига етди.

Пандемия бошидан буён Японияда 387 229 киши коронавирусга чалинган, 5688 киши вафот этган.

Ўзбекистонда коронавируснинг «британча» штамми аниқлангани ҳақида 30 январь куни маълум бўлди. У Дубайдан келган фуқарода қайд этилган.