Тошкентдаги «Чилонзор буюм савдо комплекси» АЖда қурилиши режалаштирилган дўконни 25 минг долларга аукцион орқали олиб бермоқчи бўлган бозор масъули ва унинг шериги ушланди. Бу ҳақда «Дарё»га Бош прокуратура ахборот хизмати раҳбари Ҳаёт Шамсутдинов маълум қилди.
Бош прокуратура ҳузуридаги Департамент ҳамда ДХХнинг Тошкент шаҳар бошқармалари томонидан ўтказилган тезкор тадбирда «Чилонзор буюм савдо комплекси» АЖда дўкон сотувчиси бўлиб ишловчи Н.Р. фуқаро Д.Б.нинг ишончига кириб, мазкур савдо комплекси ҳудудида қурилиши режалаштирилган савдо дўконларидан бирини аукцион савдоси орқали ютиб олиб бериш масаласини бозор муҳандиси А.С. орқали ҳал қилиб бериши эвазига 25 000 доллар сўраган. Шундан 9 400 долларини қўлга киритиб, қолган 15 600 долларини олган вақтида ашёвий далил билан ушланган.
Шундан сўнг Н.Р.нинг кўрсатувларига асосан тадбир давом эттирилганда «Чилонзор буюм савдо комплекси» АЖ капитал қурилиш бўлими бош муҳандиси А.С. дўкон сотувчисидан 10 000 долларни олган пайтида ашёвий далил билан ушланган.
Ҳолат юзасидан А.С. ва Н.Р.га нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
Мавзуга доир:
- Тошкентда Президент совға қилган хонадонга 10 минг доллар эвазига кадастр ҳужжати расмийлаштириб беришни ваъда қилган шахслар ушланди
- Сирдарёда 12 сотих ерни расмийлаштириб бериш учун 1200 доллар талаб қилган қурилиш бўлими бошлиғи ва унинг ўртада воситачилик қилган шериги ушланди
- Самарқандда бир гектар ер ажратиб бериш эвазига 30 минг доллар сўраган ҳокимлик ходими қўлга олинди
- Андижонда саноат зонасидан ер олиб беришни ваъда қилиб, пора олган собиқ кадастр ходими қўлга олинди
Изоҳ (0)