БМТ бош котиби Антониу Гутерриш ҳокимиятни ҳарбий йўл билан эгаллаш фонида Мьянма давлат раҳбари Вин Мьиннинг, «Демоктратия учун миллий лига» партияси етакчиси Аун Сан Су Чжининг ва бошқа амалдорларнинг ҳибсга олинишини қоралади. Бу ҳақда Reuters маълумотларига таяниб «Коммерсантъ» хабар берди.
«Бош котиб Мьянма янги парламентининг сессияси очилиш арафасида бир нечта сиёсий етакчилар ҳибсга олинишини қатъий қораламоқда», — дейди бош котиб вакили Стефан Дюжаррик ўз баёнотида. Шунингдек, бош котиб мамлакат ҳарбий кучларини халқ иродасини инобатга олишга, демократия меъёрларини бузмасликка ва ҳар қандай муаммони тинч йўл билан ҳал қилишга даъват қилди.
Бундан ташқари, Ҳиндистон, Сингапур ва Австралия Ташқи ишлар вазирликлари ҳам мамлакатдаги ҳолатдан хавотирда эканини билдирди. АҚШ ҳукумати эса ҳибсга олинган амалдорларни озод қилишга чақирди.
Шунингдек, Мьянма Банкирлар ассоциацияси мамлакатдаги барча банклар вақтинчалик иш фаолиятини тўхтатишини эълон қилди. Қарор олиб борилаётган ҳарбий ҳаракатлар фонида қабул қилинди.
Маълумот учун, 1 февраль куни Мьянма ҳарбий кучлари мамлакатда фавқулодда ҳолат эълон қилди ва ҳокимият бошқаруви Қуролли Кучлар бош қўмондони Мин Аунг Хлайн қўлига ўтди. Давлат раҳбари, ҳукмрон партия етакчилари, шунингдек, бир нечта партия аъзолари ва ҳукумат расмийлари қамоққа олинди. Алоқа соҳасида узилишлар мавжуд, телевидение ва радио эфирлари вақтинча узиб қўйилди ва банклар фаолияти тўхтатилди.
Аввалроқ Мьянмада ҳарбийлар ҳокимиятни эгаллаб олгани ва бир йилга фавқулодда ҳолат эълон қилингани ҳақида хабар берилган эди.
Изоҳ (0)