Қашқадарё вилояти ҳокими Зоир Мирзаев 2021 йил 1 февралдан қисқа муддатли меҳнат таътилига чиқди ва 31 январь, якшанба куни Тошкент шаҳрига жўнаб кетди. Бу ҳақда вилоят ҳокимлиги ахборот хизмати маълум қилди.
Ҳокимлик ахборот хизматининг ёзишича, Зоир Мирзаевнинг ўринбосарларига тенглаштирилган ҳоким маслаҳатчилари ҳам қисқа муддатли даволаниш таътилига чиқиб, вилоят шифохоналарида саломатлигини тиклаб олади.
«Дарё» мухбири билан суҳбатлашган Зоир Мирзаевнинг матбуот котиби Аҳрор Содиқовнинг маълумот беришича, айни кунда вилоят раҳбарининг ўринбосарларга тенглаштирилган 6 нафар маслаҳатчиси мавжуд.
Аниқланишича, 1 февралдан нафақат вилоят раҳбари, вилоят прокурори, ИИБ бошлиғи ва солиқчилар раҳбари ҳам меҳнат таътилига чиқади.
Вилоят ҳокими Зоир Мирзаев 2021 йил 17 январь куни вилоятдаги барча туман ҳокимлари ва ўринбосарларини меҳнат таътилига кузатгандан сўнг уларнинг ўрнига ёшларни 10 кунга раҳбар этиб тайинлаганди. Бироқ Зоир Мирзаев ўзининг ўрнини ёшларга ишонмади. Демак, катта эҳтимол билан Зоир Мирзаевнинг таътили тугагунга қадар вилоятни бошқариш унинг биринчи ўринбосари Ўткир Бўтаевга ишониб топширилади.
«Тўғриси, барча туман ва шаҳарларга 10 кунга ёш ҳокимлар тайинлангач, вилоят раҳбари таътили пайтида ҳам бу масъулият қайсидир ёшга ишониб топширилади, деб ўйлагандик. Бироқ бундай бўлмади. Бунга балки, Яккабоғ воқеаси сабаб бўлгандир. Балки, умуман бу режада бўлмагандир», — дейди вилоятдаги фаол блогер Отабек Ортиқов.
Эслатиб ўтамиз, аввалроқ вилоятда 10 кун муддатга ҳокимлик вазифасини бажаришга киришган ёш ҳокимлар ҳақида хабар берилиб, Деҳқонободни бошқарган Адҳам Қулмаматовнинг тумандаги заводга бориб, қанча ёшни ишли қилгани билан қизиққани, Яккабоғ ҳокими вазифасини бажарувчи Сетора Эргашева эса унга мурожаат қилган фуқаро билан тортишиб қолиб, «опа, сиз менга ‘понятка’ берманг», дегани, Шаҳрисабз шаҳрининг ёш ҳокими Сабрина Турсунова шаҳардаги «роддом»нинг бир қисми сотилгани ҳақидаги мурожаатни тинглаб, масалага ойдинлик киритгани ҳақида хабар берилганди.
Изоҳ (0)