Ўзбекистонда хорижда ишлаб чиқариладиган 529 турдаги товар ва хизматларни давлат харидлари сифатида импорт қилиш тақиқланди. Бу ҳақда Вазирлар Маҳкамасининг «Маҳаллий ишлаб чиқарувчиларни қўллаб-қувватлаш чора-тадбирлари тўғрисида»ги қарорида белгиланди.
Рўйхатга, жумладан, қуйидагилар киритилди:
- озиқ-овқат маҳсулотлари (шоколад, кунгабоқар ёғи, сут маҳсулотлари, гўшт ва ҳоказо);
- фармацевтика маҳсулотлари (дори воситалари ва тиббиёт буюмлари);
- транспорт ва унинг эҳтиёт қисмлари (шиналар, эҳтиёт қисмлари);
- маиший техникалар (кондиционер, музлаткич, монитор, кир ювиш машинаси, телевизор ва ҳоказо);
- тракторлар, енгил ва юк автомобиллари.
Қайд этилишича, бу жаҳон коронавирус пандемиясининг иқтисодиётга салбий таъсирини камайтириш, савдо бозорларининг қисқариши оқибатида иқтисодиётнинг қатор тармоқ ва соҳаларидаги корхоналарнинг ишлаб чиқариш фаоллигини чекловчи омилларни қисқартириш, шунингдек, маҳаллий саноат маҳсулотлари ишлаб чиқариш ҳажмларини кенгайтириш мақсадида амалга оширилади.
Шу билан бирга, тақиқланган товарларни олиб кириш маълум шартларда рухсат берилади. Импорт қилувчи чет элдан импорт қилиниши режалаштирилган маълум бир маҳсулот турини олиб кириш учун давлат бутуртмачисини ишчи органига ариза билан мурожаат қилади. Унда импорт қилиниши режалаштирилган маҳсулот рўйхатда келтирилган товарлардан фарқлари тўғрисидаги маълумот ҳам келтирилади.
Таклиф тасдиқлаш учун юборилади ва у 8 босқичдан ўтганидан сўнг ариза маъқулланганлиги ёки рад этилганлиги маълум қилинади.
Изоҳ (0)