Пьер Ришар иштирокидаги «Ўйинчоқ» фильмидаги миллионер болакайнинг тақдири қандай кечди?

Миллионернинг ўғли — отасининг саройида машинада пойга ўйнайдиган, тирик одамларни сотиб оладиган, жазодан қўрқмай овқатланиш столини ағдарадиган бола. «Ўйинчоқ» комедиясида ўжар болани ўйнаган Фабрис Грекони барча шундай эслайди.

Унинг бош роли унутилмас даражада ягона бўлиб қолди. Болакай 10 ёшида экранларда пайдо бўлган. Кино оламига ҳам кутилмаган воқеалар билан кириб келган. Аммо ёш бўлишига қарамай талтайган бой боланинг образини муваффақиятли даражада ижро этган. Сюжетга кўра, Эрик отасидан газетадаги қизил сочли журналистни сотиб олишни талаб қилади. Бу билан у ўзини худди янги ўйинчоқ сотиб олаётгандек тутади. У отасидан ўрнак олган ҳолда ҳамиша буйруқ беради, масхара қилади ва кучини намойиш қилади. Бола дастлаб томошабинларда нафрат уйғотади. Лекин комедия сифатида бошланган фильм якунда ҳақиқий драмага айланади. Чунки унда аслида бой, аммо ота-она меҳридан мосуво қашшоқ бола тасвирланган эди.

Фильмнинг келиб чиқиши

Режиссёр Франсис Вебернинг сўзларига кўра, «Ўйинчоқ» комедиясининг ғоясида кўчадаги воқеадан илҳомланган. Бир куни режиссёр ўйинчоқлар дўконининг олдида оломон тўпланганини кўради. Ҳамма йиғлаб ўтирган болани томоша қилар, атрофидаги гавжум одамдан қўрқиб кетган энагадан эса бола нималарнидир талаб қилар эди. Болакайнинг ёнида бир халта ўйинчоқ бўлишига қарамай, у яна кўпроғини истар эди. Бу унга етарли эмасди. Кўринишдан бола бой оилада дунёга келган. Бақир-чақир қилаётган бола отасига ҳаммасини айтиб, энагаларни ишдан бўшатиш билан қўрқитарди. Ушбу воқеа Веберда ўзгача таассурот қолдирди. Ўша куни тунда у одамларни сотиб олишгача борадиган миллионернинг ёвуз ўғли ҳақида ҳикоя ёзди.

Катталардек нигоҳга эга кичкинтой

Аммо ушбу ҳикоя ҳикоялигича қолаверди. Орадан 15 йил ўтиб, актёр Вебер Пьер Ришар билан суҳбатлашгач, ўша эски воқеа ҳақида сўзлаб берган. Ришар бу вақтда анчагина машҳур бўлиб, нафақат французлар орасида, балки дунё бўйлаб мухлислар орттирган эди. Вебернинг ҳикоясидан сўнг актёр буни суратга олиш кераклигини, ҳатто ўзи фильм продюсери бўлишини таклиф этган. Ва у Веберни бунга кўндиришга муваффақ бўлди. У режиссёрга атрофдаги инсонларни ўзининг қуллари, деб биладиган бой инсон ҳақида фильм яратилса, бу ажойиб комедия бўлишини маълум қилди. Катта персонажлар учун актёрлар муаммосиз топилди. Аммо Рамбаль-Кошенинг меросхўри — Эрикни ким ижро этиши номаълум бўлган. Эркатой, инжиқ, аммо ёқимтой. Бу борада юзлаб болалар режиссёрнинг синовида иштирок этди, аммо ҳеч ким унинг кутганидек бўлиб чиқмади. Шунда кастинг жараёнидан чарчаган режиссёр ташқарига бир оз дам олиш учун чиқади. Унинг ёнида тамаки чекиб турган ижодий гуруҳ аъзоларининг биридан «Қизингиз яхшими?» деб сўрайди. «Менинг ўғлим бор, у 10 ёш» деб жавоб беради эркак ва унинг суратини кўрсатади. Суратдаги бола катта-катта кўзлари билан Веберга қараб турар эди. Бу бола ота меҳридан бўлак барча нарсага эгадор бой боланинг ролига жуд мос келган эди.

Ришар такрорий дублларга тоқат қила олмас эди

Суратга олиш ишлари бошланди. Фабрис Греко ўз ролини қойилмақом қилиб ижро этганди. Лекин Вебер ва Ришар бу борада кўп қийинчиликка учраган. Гап шундаки, Ришар такрорий дублларни ёқтирмасди. У саҳнани биринчи марта бўлгани каби яхши ўйналмаслигига амин бўлган ва такрорий дубллардан ҳеч қандай маъно йўқ деб билган. Ва бунда режиссёр билан баҳслашиш бефойда эканлигини тан олган. Кейинчалик у ўз ролига шу қадар берилиб кетганидан, ижролари орасида ушбу образ энг севимлисига айланганини ҳам айтиб ўтган.

Машҳурлик ҳамда 6 ойлик уй қамоғи

«Ўйинчоқ» комедиясидан сўнг машҳур Фабрис ўзини қандай тутишни билмай қолган. У Париж яқинидаги кичик шаҳарнинг диққатга сазовор инсонининг бирига айланганди. Одамлар уни томоша қилишга келган. Шунингдек, Фабрис учун кўчада юриш имконсиз бўлиб қолганди. Томошабинлар дарҳол уни қўли билан кўрсатар эди. Журналистлар унинг уйи эшиги олдида навбатчилар каби турарди. Унга ёзилган мактубларни-ку айтмаса ҳам бўлади. Ҳаммаси дастлаб ёқимли туйилган, аммо кейинчалик бунинг акси бўлиб чиққан. Фабрис уятчан ва содда бола бўлиб, шов-шувлардан қаттиқ қийналар эди. Ашаддий мухлислардан бири унга кўчада ташланиб, кўйлагини йиртганида Фабрисда ҳақиқий асабийлик пайдо бўлган. Шунинг учун ҳам кейинги 6 ой мобайнида у ўзини одамларга кўрсатмаслик учун уйидан чиқмаган. Шу вақт ичида боланинг ота-онасига кўплаб таклифлар келиб тушган. Аммо ота уларга шунчалик юқори тўловларни айтганидан сўнг таклифларнинг сони камайган. Орадан бир оз вақт ўтиб, «Ўйинчоқлар» комедиясидаги юлдузга қизиқиш камайиб, Фабрис яна оддий бола каби нафас ола бошлаган.

Матбуотни ёқтирмайдиган веб-дизайнер

Фабрис ўрта мактабни тугатганидан сўнг дастурий таъминот муҳандисларини тайёрлайдиган коллежга ўқишга кирган ва веб-дизайнерлик соҳасини эгаллаган. Фабрис актёрлик карьераси ҳақида ўйлаб ҳам кўрмаган. Унинг учун биргина роль етиб ортган эди. У бу каби шон-шарафга тўла ҳаётга лойиқ эмаслигини билганди. У ҳанузгача Париж яқинидаги шаҳарчада оиласи ва қизи билан яшайди. Ҳозирда ҳам ёшлигидаги каби журналистлар билан мулоқот қилишни ёқтирмайди. Бироқ тез-тез «Ўйинчоқ» комедиясининг суратга олиш жараёнлари ҳақида гапиради ва бирга роль ижро этган Пьер Ришар ҳақидаги илиқ хотираларни сақлаб қолган.