Европа футбол жамоатчилигининг бор эътибори «Ливерпуль»нинг АПЛда 2017 йилнинг апрелидан бери илк марта ўз майдонида мағлуб бўлганига (Англия чемпионати 18-туридан ўрин олган «Бёрнли»га қарши ўйин 0:1) қаратилганида, Испания Ла Лигасида Диего Симеоне бошчилигида мадридликлар матонат ва характер кўрсатиб, «Эйбар»дан устун келди. Шу тариқа «Атлетико» чемпионатдаги етакчилигини янада мустаҳкамлаб олди.
Хўш, «Атлетико»нинг 20/21 йилдаги ўзига хос хусусияти нимада?
Биринчидан, албатта, бу Луис Суаресни сотиб олиш билан боғлиқдир. Симеонега ўз футбол фалсафаси бўйича айнан Суарес каби, деярли барча вазиятларда рақибни аямайдиган ва уларнинг ҳаммасидан фойдалана оладиган ҳужумчи етишмаётганди.
Унгача «матрасчилар» сафида марказий ҳужумчи позициясида ўйнаган Диего Коста ва Альваро Мората уругвайликдан даража жиҳатидан анча пастда эди. Натижада, Луис ҳар иккаласини жимгина таркибдан чиқариб юборди (бири «Юве»га ижарага берилди, иккинчиси билан шартнома бекор қилинди) ва ушбу мавсумда «Атлетико»нинг энг яхши тўпурарига айланди. Унинг ҳисобида (Ла Лигада) 15 та ўйин 12 та гол бор.
Айнан Суарес юқорида қайд этилган «Эйбар»га қарши қийин кечган ўйинда ғалаба дублининг муаллифига айланди. Тўғри, у ҳали Чемпионлар Лигасида гол ура олгани йўқ, аммо бу фақат вақт масаласидир.
Жамоа муваффақиятларидаги кейинги муҳим омил Маркос Льорентенинг майдондаги позицияси ўзгариши бўлди. Диего Симеоне ушбу мавсумда уни ҳужум чизиғига яқинлаштирди. Собиқ таянч ярим ҳимоячиси ҳозир форвард ёки ҳужумкор ярим ҳимоячи ролини бажармоқда, фақатгина вақти-вақти билан майдон марказидаги ёки ўнг қанотдаги муаммоли жойларда ёрдамлашмоқда, холос. Ушбу ўзгаришлар эса футболчининг фойдали иш коэффициенти, самарадорлигининг кескин ўсиши ва, албатта, трансфер нархида ўз аксини топмай қолмади.
Эндиликда 25 ёшли испаниялик Суаресни тўп билан таъминлашдан ташқари тез-тез ўзи ҳам гол уришни канда қилмаяпти. Таққослаш учун Льоренте 2019/20 йилги мавсумда 36 ўйин ўтказиб, 5 та гол ва 5 ассистни амалга оширганди. 20/21 йилда эса у 23 ўйинда 7 та гол ва 5 голли узатмани амалга оширишга улгурди.
Шунингдек, Киран Триппьер ҳам Испанияга тўлалигича мослашиб олди. Премьер Лигадан келган футболчи агар ўтган мавсумни мослашишга сарфланган бўлса, 20/21 йилги мавсумда у сезиларли даражада яхши ҳаракат қилмоқда. Жамоани Габи тарк этганидан сўнг эса англиялик футболчида стандартларни бажариш борасида ўнг оёқли рақобатчи қолмади ҳисоб, шу сабабли Киран голли узатмалар сони бўйича ўтган йилги чемпионатдаги кўрсаткичини янгилашга ҳам улгурди:
19/20 йилги мавсум – 25 та ўйин, 4 та голли узатма,
20/21 йилги мавсум – 14 ўйин, 5 та ассист.
Симеоненинг стандартларга бўлган алоҳида ёндашуви ва иккинчи қаватда ўйнай оладиган юқори тоифадаги футболчилар борлигини ҳисобга олиб, кўрсаткич аниқ ўсишда давом этади. Триппьер мавсумнинг биринчи ярмида энг юқори ўртача кўрсаткичга эга бўлганди. Ҳатто у бу борада юқорида айтиб ўтилган ҳужумчиларни ҳам ортда қолдирди. Аммо яқинда инглиз футболчиси спорт ўйинларига пул тикишда айбланди. Шу тариқа унинг барча ҳаракатлари бекор кетди ва бу ўз навбатида «Атлетико»нинг муваффақиятларига ҳам хавф солди.
Англия футбол ассоциацияси футболчини 10 ҳафтага дисквалификация қилди ва бу чеклов 2020 йилнинг 23- декабридан барча мусобақаларда кучга кирди. Шу сабабли Триппьер аллақачон 4 та лига ўйинини ҳам ўтказиб юборди. Аммо шу йил бошида ФИФА «Атлетико»нинг апелляциясидан сўнг футболчининг 10 ҳафталик дисквалификациясини расман тўхтатиб қўйди. Ҳозирда жазонинг унчалик оғир бўлмаслигига умид қилинмоқда.
Жоа Феликс. Ўтган мавсумда ўзига сарфланган маблағлар учун масъулият юкини ҳис қилган ҳолда кутилган ўйинни намойиш эта олмаган португалиялик аста-секин нималарга қодир эканини исботлашни бошлади ва баъзида ўйин тақдирини ҳал қилишда асосий ролларни бажармоқда. Нима бўлганда ҳам 21 ёшли иқтидор эгаси Симеоне жамоаси натижасига тобора кўпроқ таъсир ўтказмоқда.
19/20 йилги мавсум – 36 ўйин, 9 та гол, 3 та ассист
20/21 йилги мавсум – 23 ўйин, 8 гол та 4 голли пас.
«Атлетико» муваффақиятидаги яна бир муҳим омил, бу Янник Феррейра Каррасконинг қайтиши бўлди. Бельгиялик Хитойга пул ишлаш учун кетгач ҳам яна Европага қайтиб, у ерда юқори даражада ўйнаш мумкинлигига яққол мисолдир. Бир йил давомида «Атлетико»да ижарада ўйнаган бельгиялик барқарор ўйин кўрсатди ва ҳали ҳам Европанинг энг яхши футболчилари билан рақобатлаша олишини исботлади. Шу тариқа Янник «матрасчилар» раҳбариятини 2020 йилнинг ёзида тўлақонли шартнома имзолашга ишонтира олди. Ҳозир Карраско ўзига билдирилган ишончни тўлалигича оқламоқда ва чемпионат ўйинларида уч бор энг яхши ўйинчи деб топилди.
19/20 йилги мавсум – 16 ўйин, 1 та гол, 4 та ассист
20/21 йилги мавсум – 18 ўйин, 3 та гол, 5 та ассист
Ва, албатта, асосий омил бу жамоанинг ҳимоя чизиғи ва дарвозабонидир. «Атлетико» «қуруқ» ўйинлар сони бўйича етакчилик қилмоқда, Симеоне шогирдлари Испания чемпионатнинг 17 учрашувида атиги 7 та гол ўтказиб юборган, бу кучли бешлик чемпионатлари орасидаги энг яхши натижадир. Аслини олганда, «матрасчилар» ҳимояси доимо ишончли ўйинлари билан машҳур бўлиб келган, аммо жорий мавсумда улар ҳар қачонгидан ҳам ишончли ўйин кўрсатмоқда. Марио Эрмосонинг ўйиндан ўйинга ўсиб бораётгани, Стефан Савич, Фелипе ва Хосе Мария Хименеснинг ишончли ва барқарор ўйинлари аксарият ҳужумларни зарарсизлантириш кафолатини бермоқда. Дарвозада Ян Облак каби ўсишдан ва маҳоратини оширишдан тўхтамайдиган посбон бўлиши эса жамоанинг Европада энг кам гол ўтказиб юборишини таъминлайди.
«Атлетико»нинг ҳимояси:
19/20 йилги мавсум – 38 ўйин, 17 та «қуруқ» ўйин
20/21 йилги мавсум – 17 ўйин, 11 та «қуруқ»
Ушбу «Атлетико»да барча нарса мужассам. Меҳнатсеварлик, характер, иштиёқ, маҳорат ва замонавий футболда камдан кам учрайдиган футболга бўлган муҳаббат. Клубдаги бу мукаммал мувозанат қанча давом этишини ҳеч ким билмайди, шунинг учун вақтингизни беҳуда сарфламанг ва «Атлетико»нинг ўйинларини томоша қилиб қолинг.
Изоҳ (0)