2021 йил январь ойининг охири ҳолатига кўра бутун дунёда 84,9 миллион доза коронавирус инфекциясига қарши вакцина ишлатиб бўлинди. Бу ҳар 100 кишига 1,1 дозадан юборилганини англатади, дейилади Our World in Data маълумотларида.
Аҳолини COVID-19’га қарши эмлаш тезлиги бўйича ҳанузгача Исроил етакчилик қилмоқда, мамлакатда ҳар 100 одамга 48,9 доза вакцина тўғри келади.
Қитъалар ўртасида ҳам фарқ сезиларли даражада, Африкада вакцинация бўйича дастурлар ишга туширилмаган, Шимолий Америкада эса ҳар 100 кишига 4,7 дозадан тўғри келмоқда.
Бойлиги кам бўлган давлатлар COVAX дастуридан фойдаланишга интилмоқда ва унга кўра йил охирига қадар 2 миллиард доза вакцина уларга ажратилиши мумкин.
Маълумотларда бутун дунё бўйича саккизта вакцинадан фойдаланиб келинаётганлиги қайд этилган. Pfizer-BioNTech вакцинасининг самарадорлиги 95 фоизни ташкил қилади ва ундан 49 та мамлакат аҳолисини эмлашда фойдаланилмоқда. Яна бир қанча давлатлар ўз вакциналарини тасдиқлаган, бироқ уларни ишлатишни бошламаган. Вирусдан тўлиқ ҳимояланиш учун юқорида санаб ўтилган вакцинанинг иккита дозасини қабул қилиш талаб этилади.
Аввал Марокаш қироли Муҳаммад VI 28 январь куни фуқароларни коронавирус инфекциясига қарши эмлаш бўйича миллий кампания бошлашни маъқуллагани, Германиядаги Роберт Кох номли вирусология институтининг вакцинация бўйича доимий комиссияси (STICO) 18 ёшдан 64 ёшгача бўлган фуқаролар учун AstraZeneca инглиз-швед фармацевтика компаниясининг вакцинасидан фойдаланишни тавсия қилгани, шунингдек, Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков Ўзбекистонда COVID-19’га қарши вакцинация жараёнининг дастлабки босқичида 50 мингга яқин аҳоли эмланишини билдиргани ҳақида хабарлар берилганди.
Изоҳ (0)