Венгрияда маҳаллий Озиқ-овқат ва фармацевтика идораси Хитойнинг Sinopharm компаниясининг коронавирусга қарши вакцинасини тасдиқлади. Мамлакат Европа Иттифоқида биринчи бўлиб бундай қадамни қўйди, деб хабар беради «Интерфакс».
«Миллий фармакология ва озиқ-овқат институти бугун Sinopharm вакцинасини маъқуллади», – деди мамлакат бош санитария шифокори Сесилия Мюллер.
Венгрия бош вазири Виктор Орбан 29 январь куни мамлакат Sinopharm вакцинасини сотиб олиш бўйича шартномани тез орада якунлашини айтди. Шунингдек, у ушбу дори билан эмланишни ният қилган.
«Шахсан мен ўзим ишонган Хитой вакцинасини кутаман. Бу вирус ҳақида энг кўп биладиганлар хитойликлар ҳисобланади», – деди ҳукуматнинг Facebook’даги саҳифасида бош вазир.
Маълум қилинишича, расмий Будапешт Европа Иттифоқи дастури бўйича вакцина жуда секин келаётганидан шикоят қилган. Таъкидланишича мамлакатга ҳафтада 100 минг дозадан ҳам кам вакцина олиб келинмоқда. Шунинг учун Венгрия қўшимча равишда Россия ва Хитой вакциналарини сотиб олиш бўйича музокаралар ўтказган.
Sinopharm биринчи партияда миллион доза вакцина етказиши мумкин.
Шунингдек, Венгрия Европа Иттифоқида биринчи бўлиб Россиянинг «Спутник V» вакцинасини рўйхатдан ўтказган ва сотиб олишга қарор қилгани ҳақида хабар берилганди.
Маълумот учун, Венгрияда пандемия бошланганидан бери деярли 365 минг киши коронавирус билан касалланган, 12 мингдан ортиғи вафот этган.
Аввалроқ Украина Россиянинг «Спутник V» вакцинасини рўйхатдан ўтказишдан бош тортгани, Эрон «Спутник V» вакцинасини фойдаланиш учун тасдиқлагани ҳамда Хитой вакцинаси 79 фоиз самарадорлик кўрсатгани маълум қилинганди.
Изоҳ (0)