АҚШ тиббиёт хизмати мамлакатда COVID-19’нинг Жанубий Африкада пайдо бўлган штаммини юқтириш бўйича дастлабки икки ҳолат аниқлангани ҳақида хабар берди, деб ёзмоқда «Интерфакс».
Коронавируснинг ушбу юқумлироқ тури Жанубий Каролинадаги икки нафар беморда аниқланган. Бироқ мазкур беморларнинг Қўшма Штатлар ташқарисига саёҳат қилгани маълум эмас, дейилади хабарда.
Таъкидланишича, «африкача» штаммнинг ўлим даражаси қанчалик юқорилиги ҳақида ҳеч қандай далил бўлмаса-да, COVID-19’га қарши вакцинанинг мазкур турдаги вирусга таъсири кучсизроқ. Шу билан бирга, Pfizer ва Moderna вакциналарини ишлаб чиқарувчи компаниялар ўзларининг дори-дармонлари ушбу штаммга қарши самарали эканига ишонтирган.
Аввалроқ Қўшма Штатларда коронавируснинг юқумлилик даражаси юқорироқ бўлган «британча» штамми аниқланган эди.
АҚШда пандемия бошлангандан буён 26 миллион кишида COVID-19 қайд этилган, 440 мингдан ортиқ киши вирус қурбонига айланган.
Қўшма Штатларда вирусга чалиниш ҳолатининг камайиши кузатилмоқда. Аммо АҚШ президентининг тиббиёт бўйича маслаҳатчиси доктор Энтони Фаучи COVID-19’нинг «африкача» штаммини «ҳақиқатан ҳам муаммо бўлиши мумкин», дея хавотир билдирди.
Маълумот учун, олимлар коронавируснинг «африкача» штамми антитаналарга бардошли эканлигини аниқлаган.
Аввалроқ Жанубий Африка олимлари коронавируснинг янги штамми юқори даражада юқумлилигини исботлагани, Данияда ҳам коронавируснинг «африкача» штамми аниқлангани ҳақида хабар берилганди.
Изоҳ (0)