Германиядаги Роберт Кох номли вирусология институтининг вакцинация бўйича доимий комиссияси (STIKO) 18 ёшдан 64 ёшгача бўлган фуқаролар учун AstraZeneca инглиз-швед фармацевтика компаниясининг вакцинасидан фойдаланишни тавсия қилди. Бу ҳақда Deutsche Welle (DW) нашрига таяниб, «РБК» хабар берди.
Мутахассисларнинг таъкидлашича, 65 ёшдан ошганлар учун препаратнинг самарали эканига оид далиллар етарли эмас, дейилади хабарда.
STIKO — Германия учун эмлаш бўйича тавсиялар ишлаб чиқадиган мустақил экспертлар қўмитасидир. Европа Иттифоқидаги мамлакатларда вакциналарни қўллаш бўйича рухсатнома Европа Дори-дармон агентлиги (EМА) томонидан берилади. DW’нинг таъкидлашича, 29 январь куни агентлик AstraZeneca вакцинасидан фойдаланиш ёки фойдаланмаслик ҳақидаги қарорни қабул қилиши керак. Ҳозирда мазкур вакцинадан Буюк Британиядаги эмлаш кампанияларида кенг фойдаланилмоқда.
Европа Иттифоқининг турли мамлакатларида коронавирусга қарши эмлаш 2020 йилнинг декабрь ойи охири — 2021 йилнинг январь ойи бошларида бошланган. Ҳозиргача мазкур мамлакатларда EМА томонидан қўллаш тасдиқланган Pfizer/BioNTech ва Moderna вакциналаридан фойдаланилади. EМА улардан биринчисини 16 ёшдан, иккинчисини 18 ёшдан бошлаб қўллашга рухсат берди, вакциналар учун энг юқори ёш чегараси белгиланмаган.
Немис оммавий ахборот воситалари илгари AstraZeneca препаратининг кексалар учун самарадорлиги паст экани ҳақида ёзган. Bild ва Handelsblatt нашрлари мазкур вакцина 65 ёшдан ошган одамларнинг 10 фоизидан камроғида антитаналар ишлаб чиқаради, дея хабар берган. Компания эса ушбу маълумотларни «мутлақо нотўғри» деб атаган ҳамда Буюк Британиянинг вакцинация ва иммунизация бўйича бирлашган қўмитаси томонидан AstraZeneca’ни кексаларда қўллаш маъқуллангани ва эмланганларда иммунитет миқдори ортаётганини таъкидлаган.
AstraZeneca Европа мамлакатларига вакцина етказиб беришни қисқартирмоқчилигини маълум қилди. 2021 йилнинг дастлабки уч ойида компания буюртма қилинган партиянинг 60 фоизи — деярли 31 миллион дозадаги вакцинани етказиб бермайди. Компаниянинг Европа Иттифоқи билан тузилган шартномасида март ойига қадар 80 миллион дозали препаратни етказиб бериш назарда тутилган.
Аввалроқ Австралияда олимлар AstraZeneca вакцинасининг самарадорлигига шубҳа билдирганди.
Британияда аҳолини AstraZeneca вакцинаси билан эмлаш январь ойининг бошидан бери давом этмоқда. Биринчи бўлиб вакцинани 82 ёшли Брайан Пинкер қабул қилганди.
Изоҳ (0)