2020 йилда халқаро саёҳатлар сони 1 миллиардга ёки 74 фоизга камайди, шу тариқа ўтган йил туризм учун кузатишлар тарихидаги энг ёмон йилга айланди. Бу ҳақда БМТнинг Жаҳон сайёҳлик ташкилоти (БМТ ЖСТ) маълумотига таяниб «Интерфакс» хабар берди.
«Коронавирус пандемияси ва унга боғлиқ ҳолда кенг тарқалган саёҳат чекловлари туфайли 2020 йилда халқаро сайёҳларнинг ташрифи бир миллиардга ёки 74 фоизга камайди. Туризм экспортидан тушадиган даромад 1,3 триллион долларга қисқарди, бу 2009 йилги жаҳон иқтисодий инқирози келтирган зарардан 11 баравар кўпдир. Булардан келиб чиқиб 2020 йилни халқаро туризм учун кузатувлар тарихидаги энг ёмон йил деб аташ мумкин», — дейилади БМТ ЖСТ баёнотида.
Ташкилотнинг таъкидлашича, инқироз сайёҳлик соҳасида 100-120 миллионтагача иш ўринларининг йўқ бўлиб кетиш хавфини келтириб чиқарди, уларнинг аксарияти кичик ва ўрта бизнесга тўғри келади.
«Халқаро туризм хавфсизлигини яхшилаш бўйича кўплаб чоралар кўрилганига қарамай, инқироз ҳали якунига етмаганини биламиз. Аксарият мамлакатлар коронавирус мутациялари туфайли саёҳат учун янги ва қатъий чекловлар ўрнатмоқда, жумладан, мажбурий тестлар, карантин, баъзи ҳолларда эса чегараларни тўлиқ ёпиш сингари. Буларнинг барчаси халқаро саёҳатларни тиклашга қарши таъсир қилади. Шу билан бирга, босқичма-босқич эмлаш мижозларнинг ишончини тиклаб, чекловларни юмшатиш ва вазиятни нормаллаштиришга ёрдам беради », — дейилади баёнотда.
БМТ ЖСТ маълумотларига кўра, пандемия оқибатида сайёҳлик бўйича энг кўп зарарни Осиё-Тинч океани минтақаси кўрди, бунга минтақада ўрнатилган ўта қаттиқ чекловлар сабаб бўлган. Минтақага келган халқаро сайёҳлар сони 2020 йилда 300 миллионтага ёки 84 фоизга пасайди. Яқин Шарқ ва Африкада ташрифларнинг камайиши 74 фоизни, Европада 70 фоизни ташкил қилди. Шу билан бирга, 2019 йилга нисбатан мутлақ саёҳатлар сонининг энг катта пасайиши Европа қитъасида (500 млн) қайд этилди. Америка қитъасида чет эллик сайёҳлар сонининг камайиши 69 фоизни ташкил этди.
Аввалроқ ЖССТ коронавирусга қарши эмланганлик тўғрисидаги ҳужжатнинг мавжудлиги хорижга сафар қилишнинг мажбурий шартига айланмаслиги лозим деб ҳисоблаган, АҚШ эса мамлакатга келувчи барча учун карантин жорий этилишини маълум қилган.
Изоҳ (0)