Халқ таълими тизимида математика фанини ўзлаштириш бўйича энг паст кўрсаткич – Тошкент шаҳри ва вилояти деб баҳоланган. Бу ҳақда 26 январь куни Халқ таълими вазирлигида бўлиб ўтган матбуот анжуманида Фан, таълим ва соғлиқни сақлаш масалалари қўмитаси раиси Одилжон Иминов маълум қилди.
«Халқ таълими тизимини ўзрганишимиз давомида айрим фанларни ўзлаштириш бўйича кўрсаткич Тошкент вилояти Қорақалпоғистондан пастлигини кўрдик. Хусусан, Тошкент шаҳри ва вилоятида математика фанини ўзлаштириш республика бўйича энг паст даражада деган хулосага келдик», – деди Одилжон Иминов.
Шунингдек, республика бўйича ўқувчиларнинг умумий ўзлаштириш даражаси Сирдарё вилоятида 60,7 фоиз, Тошкент вилоятида 62,4 фоиз, Жиззах вилоятида 62,7 фоиз, Андижон вилоятида 64,2 фоиз, Наманган вилоятида 64,4 фоизни ташкил этиб, республика кўрсаткичидан паст даражада қайд этилган.
Сенаторнинг айтишича, айрим фанлардан назорат ишлари ўтказилганда, ўқувчиларнинг ўзлаштириш даражаси физика фанидан 54,6 фоиз, кимё фанидан 54 фоиз натижани кўрсатган.
«Бундай салбий ҳолатларнинг олдини олиш учун парламент назоратини йўлга қўйиб, жамоатчиликни, жойлардаги кенгашларимизни жалб этиш орқали бу жараёнлар ошкора, шаффоф тарзда айтилиши керак. Математикани билмасдан туриб келажакка ишониб бўлмайди», – деди Одилжон Иминов.
Изоҳ (0)