Ўзбекистоннинг барча вилоятларида «Ёшлар саноат ва тадбиркорлик зонаси» ташкил этилади ва бу масалага Инвестиция ва ташқи савдо вазири Сардор Умурзоқов масъул бўлади. Бу ҳақда 27 январь куни Президент Шавкат Мирзиёев раислигида ўтказилган видеоселектор йиғилишида сўз юритилди, дея хабар бермоқда «Дарё» мухбири.
Давлат раҳбарининг таъкидлашича, Сардор Умурзоқов вилоят ҳокимлари билан бирга ушбу саноат зоналарини ёшларга мос, зарур инфратузилмага эга бўлган қулай жойларда ташкил этиш дастурини ишлаб чиқади.
«Мисол учун, Қарши шаҳрида 3 минг нафар ишсиз ёшлар мавжуд. Шаҳардаги 5,5 гектар майдонда ташкил этилган ‘Ёшлар саноат ва тадбиркорлик зонасиъда 140 та лойиҳа доирасида 1 минг нафар ёшлар иш билан таъминланади.
Шунингдек, 2021 йил биринчи чорагида ишсиз ёшларнинг 350 нафарини кредит бериш орқали тадбиркорликка жалб қилиш, 360 нафарини тадбиркорларга бириктириш, 150 нафарини касбга-ҳунарга ўқитиш, ташкиллаштирилган миграция орқали 118 нафарини хорижга юбориш орқали қарийб 1 минг нафарининг бандлигини таъминлаш имкони мавжуд», — деди Президент.
Йиғилишда маълум қилинишича, Қашқадарё вилоятида 18—30 ёшгача бўлганлар 645 минг нафар, шундан ишсизлар сони 27 минг нафарни ташкил этади. Вилоятда ҳисобга олинмаган ишсиз ёшлар камида 150 минг нафардан иборат.
«Вилоятда 2 мингдан зиёд ижтимоий муаммоси мавжуд, 4 мингдан ортиқ ногиронлиги бўлганлар, 887 нафар жиноий жазо ўтаётган ёшлар бор», — деди Шавкат Мирзиёев.
Мавзуга доир:
- «2021 йилда 500 минг нафар ўқувчи ва 100 минг нафар талабани ички туризмга жалб қиламиз» – Шавкат Мирзиёев
- «Пойтахтдаги 85 та талабалар уйи атиги 13 фоиз ёшларни турар жой билан таъминлаш имкониятига эга» – Шавкат Мирзиёев
- Шавкат Мирзиёев: «Тошкент шаҳрида 77 мингта вакант иш ўринлари мавжуд, шундан 45 мингтасига олий маълумот талаб этилмайди»
Изоҳ (0)