Ўзбекистонда ёшлар муаммоларини тизимли ҳал этиш мақсадида, Республика ишчи гуруҳи жойларда ўғил-қизларнинг таклифларини «маҳаллабай» ўрганмоқда. Ҳозирга қадар пойтахт ва 6 та вилоятда 50 мингга яқин ёшлар билан мулоқотлар ташкил этилди. Бу ҳақда 27 январь куни Президент Шавкат Мирзиёев раислигида ўтказилган видеоселектор йиғилишида сўз юритилди, дея хабар бермоқда «Дарё» мухбири.
«Билдирилган таклиф ва истаклар асосида туман ва шаҳарлар кесимида ёшлар дастурлари тасдиқланди. Ушбу дастурларнинг ижроси ҳамда ёшларнинг ижтимоий муаммоларини тизимли ўрганиш ва мувофиқлаштириш вазифаси Давлат хавфсизлик хизматига юклатилди», — деди Президент.
Давлат раҳбарининг таъкидлашича, вазифанинг муҳимлиги инобатга олиниб, ДХХ ёшлар муаммолари бўйича режаларнинг жойларда амалга оширилишини назорат қилиб, мазкур режалар бажарилишига кўмаклашади.
Аввалроқ Президент Тошкент шаҳрида 77 мингта вакант иш ўринлари мавжудлиги, шундан 45 мингтасига олий маълумот талаб этилмаслигини, туман сектор раҳбарлари ҳафтанинг икки кунини фақат ёшлар муаммоларини ҳал этишга ажратишини ҳамда Ўзбекистондаги 18—30 ёшлилар орасидаги расмий ишсизлар сонини маълум қилганди.
Изоҳ (0)