Қозоғистондан Ўзбекистонга янги тезюрар поезди қатнови йўлга қўйилади. Бу ҳақда Қозоғистон бош вазири Асқар Мамин мамлакат ҳукуматининг кенгайтирилган йиғилишида туризм соҳасининг ривожланишига оид лойиҳаларни кўриб чиқиш доирасида эълон қилди, деб хабар беради «Kazinform».
«Сайёҳлар оқимининг ўсиши учун Туркистон—Чимкент—Тошкент йўналишидаги тезюрар темир йўллари магистрали қурилиши бошланади. Бу туризм соҳасида 22 мингта янги иш ўринини яратиш имкониятини беради ҳамда иқтисодиётнинг бошқа тармоқларида жами 100 минг та иш ўрни очилади», — деди Қозоғистон бош вазири.
Унинг сўзларига кўра, шу билан бирга, экотуризм, миллий паркларни истиқболли сайёҳлик йўналиши сифатида ривожлантириш бўйича комплекс чора-тадбирлар қабул қилинади.
Асқар Маминнинг таъкидлашича, Қозоғистон ички туристик оқими 22 фоизга ўсиб, 4,5 миллион кишини ташкил қилиши кутилмоқда. Туризмнинг ЯИМдаги улуши 5,2 фоизга етказилади.
Аввалроқ Туризмни ривожлантириш давлат қўмитаси «Ўзбекистон Республикасида зиёрат туризмини янада ривожлантириш ва зиёратчилар учун қулай шарт-шароитлар яратиш чора-тадбирлари тўғрисида»ги Президент фармони лойиҳасини муҳокамага қўйган эди. Лойиҳада Ўш—Тошкент йўлининг Хўжанддан ўтган қисми очилиши мумкинлиги қайд этилган.
Изоҳ (0)