Олий ва ўрта махсус таълим вазирлиги ижтимоий тармоқларда баъзи олий таълим муассасалари (ЎзМУ, ТДШУ, ФарПИ, ТАТУ Самарқанд филиали) талабалари орасида коронавирус аниқлангани ҳамда факультет ва ётоқхона қаватлари дезинфекция учун ёпилгани тўғрисида тарқалган хабарларга муносабат билдирди.
Аввало, бу каби хабарлар асоссиз эканини маълум қиламиз. Айтиш жоизки, хабарда кўрсатилган олий таълим муассасалари талабалари орасида айни кунларда коронавирус инфекцияси аниқланмаган ва бирорта ҳам талабалар турар жойи биноси ёпилмаган.Вазирлик ахборот хизмати доимо ижобий хабарларни тарқатишда ҳамкорлик қилишга тайёрлигини маълум қилган.Ҳурматли ижтимоий тармоқлар фаоллари!
Ҳақиқатан ҳам, ахборотни биринчи бўлиб оммага тезкор етказиш давр талаби. Лекин ҳар қандай хабарни эмас, балки текширилган, асосланган маълумотларни эълон қилиш – энг муҳим жиҳат ва журналистиканинг «олтин қоида»си эканини эслатиб ўтамиз!
Шунинг учун хабарларни тарқатишдан аввал бироз сабр қилиб, аниқлик киритиб, кейин эълон қилиш, жуда ҳам зарур бўлмаса, бу турдаги совуқ хабарларни оммалаштиришдан тийилиш мақсадга мувофиқ, деб ҳисоблаймиз!.
Чунки нотўғри талқин қилинган, ҳали тўлиқ аниқлик киритилмаган, шошилинч тарзда тарқатилган кичик бир хабар минглаб ёки милллионлаб инсонларда хавотир уйғотиши табиий, албатта. Нафақат хавотир уйғотади, балки шу касаллик ўзида бор ёки йўқлиги ҳақида шубҳа-гумонга бориб, қўшимча касалликлар орттириб олишига сабабчи бўлиши мумкин.
Шу билан бирга, асоссиз ва ёлғон ахборотни тарқатганлик учун Ўзбекистон қонунларида маъмурий ва жиноий жавобгарлик нормалари белгиланганини унутманг!
Қолаверса, Олий ва ўрта махсус таълим вазирлиги ҳамда олий таълим муассасалари бу каби (касаллик аниқланиши) ҳолатлар жиддий тус олиб, кенг тарқала бошласа, уларни яширишдан манфаатдор эмас.
Олий ва ўрта махсус таълим вазирлиги
Эслатиб ўтамиз, Ўзбекистон олий таълим муассасаларида коронавирус пандемияси сабаб 2020/2021-ўқув йили 2 сентябрдан масофавий шаклда бошланганди. Республика комиссиясининг 2020 йил 12 ноябрдаги йиғилиши қарорига мувофиқ, барча олий таълим муассасаларида 2020 йилнинг 16 ноябридан олий таълим муассасаси томонидан ишлаб чиқилган чора-тадбирлар ва режа-график асосида ўқув жараёнини анъанавий шаклда давом эттириш белгиланди. 2021 йил 11 январдан барча ОТМлар анъанавий таълимга қайтган.
Изоҳ (0)