Qozog‘istondan O‘zbekistonga yangi tezyurar poyezdi qatnovi yo‘lga qo‘yiladi. Bu haqda Qozog‘iston bosh vaziri Asqar Mamin mamlakat hukumatining kengaytirilgan yig‘ilishida turizm sohasining rivojlanishiga oid loyihalarni ko‘rib chiqish doirasida e’lon qildi, deb xabar beradi “Kazinform”.
“Sayyohlar oqimining o‘sishi uchun Turkiston—Chimkent—Toshkent yo‘nalishidagi tezyurar temiryo‘llari magistrali qurilishi boshlanadi. Bu turizm sohasida 22 mingta yangi ish o‘rinini yaratish imkoniyatini beradi hamda iqtisodiyotning boshqa tarmoqlarida jami 100 ming ta ish o‘rni ochiladi”, — dedi Qozog‘iston bosh vaziri.
Uning so‘zlariga ko‘ra, shu bilan birga, ekoturizm, milliy parklarni istiqbolli sayyohlik yo‘nalishi sifatida rivojlantirish bo‘yicha kompleks chora-tadbirlar qabul qilinadi.
Asqar Maminning ta’kidlashicha, Qozog‘iston ichki turistik oqimi 22 foizga o‘sib, 4,5 million kishini tashkil qilishi kutilmoqda. Turizmning YaIMdagi ulushi 5,2 foizga yetkaziladi.
Avvalroq Turizmni rivojlantirish davlat qo‘mitasi “O‘zbekiston Respublikasida ziyorat turizmini yanada rivojlantirish va ziyoratchilar uchun qulay shart-sharoitlar yaratish chora-tadbirlari to‘g‘risida”gi Prezident farmoni loyihasini muhokamaga qo‘ygan edi. Loyihada O‘sh—Toshkent yo‘lining Xo‘janddan o‘tgan qismi ochilishi mumkinligi qayd etilgan.
Izoh (0)