Бугунги кунда Тошкент шаҳрида 479 минг нафар ёшлардан 26 минг нафарининг бандлиги таъминланмаган. Бу ҳақда 27 январь куни Президент Шавкат Мирзиёев раислигида ўтказилган видеоселектор йиғилишида сўз юритилди, дея хабар бермоқда «Дарё» мухбири.
«‘Ёшлар: 1+1’ дастури доирасида ўғил-қизларимизда тадбиркорлик кўникмаларини шакллантиришимиз зарур. Бу масалани пойтахт мисолида кўрадиган бўлсак, Тошкент шаҳрида 479 минг нафар ёшлардан (18-30 ёш) 26 минг нафарининг бандлиги таъминланмаган. Шундан, 11 минг нафарини ўтган йилги мактаб битирувчилари ташкил қилади.
Айни пайтда, Тошкент шаҳрида 77 мингта вакант иш ўринлари мавжуд бўлиб, шундан 45 мингтасига олий маълумот талаб этилмайди. Энг қизиғи, шу пайтгача ишсиз аҳоли ва бўш иш ўринлари ўзаро уйғунликда кўриб чиқилмаган.
Мисол учун, Учтепа туманида 3 минг нафар ишсиз ёшларни касбга ўқитиш орқали, малака тоифасини бериб, давлат идораларидаги вакант ўринларга жойлаштириш мумкин. Тумандаги «Бирлик» маҳалласида 103 нафар ёшлар ишсиз. Ўрганишларда ушбу маҳалладаги 3 нафар ҳунарманд 2-3 нафардан ишсиз ёшларни шогирдликка олишини, 50 нафар тадбиркорлар эса 1 нафардан ёшларни ишга қабул қилиш истагини билдирган.
Биринчи чоракда, 10 нафар ёшларни кредит ажратиш ва субсидия бериш орқали тадбиркорликка жалб этиш мумкин. Туманда 5 мингдан зиёд тадбиркорлик субъектлари, жумладан, 600 дан ортиқ саноат корхонаси мавжуд. Йил якунига қадар 91 та инвестиция лойиҳаси доирасида 4 мингдан зиёд янги иш ўринлари яратилиши инобатга олинса, Учтепада ишсиз ёшлар умуман бўлмаслиги керак. Аксинча, бошқа вилоятдан келган ишсиз ёшларни ҳам, туманда банд қилиш имкониятларимиз мавжуд», – деди давлат раҳбари.
Аввалроқ Президент Ватанпарвар» ташкилоти Мудофаа вазирлиги тизимига ўтказилишини, Ўзбекистондаги 18-30 ёшлилар орасидаги расмий ишсизлар сонини ҳамда бош вазир ва администрация раҳбаридан рухсат сўрамай мажлис ўтказган амалдор ишдан олинишини маълум қилганди.
Изоҳ (0)