Ўзбекистонда эндиликда маҳалла раиси, профилактика инспектори, мактаб директори, ёшлар етакчиси ёшлар муаммоларини «фуқаробай» тизимида аниқлаб, сектор раҳбарлари олдига аниқ ва лўнда масалаларни қўяди. Бу ҳақда 27 январда Президент Шавкат Мирзиёев раислигида ўтказилган видеоселектор йиғилишида сўз юртилиди, дея хабар бермоқда «Дарё» мухбири.
Давлат раҳбарининг таъкидлашича, туман сектор раҳбарлари ҳафтанинг икки кунини фақат ёшлар муаммоларини ҳал этишга ажратади. Бир кун ёшлар бандлиги билан, иккинчи кун уларнинг бўш вақтини мазмунли ташкил этиш билан шуғулланади.
«Сектор раҳбарлари аниқланган муаммоларнинг ечими бўйича дастурлар ишлаб чиқиб, маҳаллий кенгашларга киритади, ижроси бўйича ҳар ойда халқ вакилларига ҳисобот бериб боради.
Ҳар бир туман ва шаҳар ҳокимининг 6 та ўринбосари, жойлардаги ташкилот раҳбарлари ўз фаолиятини қуйидаги устувор вазифалар асосида ташкил қилиши шарт: ҳокимнинг иқтисодиёт, инвестициялар ва қишлоқ хўжалиги бўйича ўринбосарлари – бандлик масалалари билан шуғулланади; солиқ идораси, савдо-саноат палатаси ва тижорат банклари раҳбарлари – ёшларни тадбиркорликка жалб қилишга; ҳокимнинг ёшлар масалалари бўйича ўринбосари – ёшларнинг бўш вақтини мазмунли ташкил этишга; туман прокурори, ички ишлар ва мудофаа бўлими бошлиқлари – уюшмаган ёшлар билан ишлаш, жиноятчиликни жиловлаш, уларда ватанпарварлик туйғуларини шакллантиришга масъул бўлади», – деди Президент.
Аввалроқ Шавкат Мирзиёев Ўзбекистондаги 18-30 ёшлилар орасидаги расмий ишсизлар сонини маълум қилгани, бош вазир ва администрация раҳбаридан рухсат сўрамай мажлис ўтказган амалдор ишдан олинишини таъкидлагани ҳамда 3 нафар ёшни иш билан таъминлашга ваъда бериб, уни бажармаган Когон шаҳар прокурорини ишдан олиш бўйича топшириқ бергани ҳақида хабар берилганди.
Изоҳ (0)