ФИФА легионер футболчилардан қарздорлиги сабаб тўртта ўзбек клубига янги футболчилари рўйхатдан ўтказишни расман тақиқлаган, дея маълум қилди ПФЛ бош директорлиги вазифасини бажарувчи Диёр Имомхўжаев.
Бу жамоалар: «Қўқон-1912», «Андижон», «Шўртан» ва «Сурхон».
«Қўқон-1912» Боян Кнежевич ҳамда Милош Николич билан боғлиқ муаммога эга. Клуб бу футболчилар пулларини тўлаб, ФИФАга мурожаат қилди ва тақиқ яқин вақт ичида олиб ташланиши кутилмоқда.
«Андижон» Виталий Мирний билан келишувга эришди ҳамда ФИФАга ҳисобот берди. Радослав Алексич билан қисман ҳисоб-китоб қилинди, тез орада унинг муаммоси ҳам ҳал бўлади. Эндиликда клуб Ибе Микаэл Окородан қарздорлик масаласини ёпиш арафасида. Бироқ бу муаммонинг ҳаммаси эмас. ФИФА Предраг Вуёвич иши бўйича «Андижон»га яна бир марта тартиб-интизом иши очган. ФИФА 25 февраль куни ишни кўриб чиқади. Клуб эса аллақачон футболчининг юристи билан алоқага чиққан ва музокара ўтказмоқда. Таъкидланишича, «Андижон» 25 феврални кутиб ўтирмай, бу ишни ҳам ҳал қилмоқчи.
«Шўртан»да муаммо етарли. Клубнинг Виталий Варивончик ва Игор Криушенко билан боғлиқ қарздорлик масаласини ҳали ҳам ҳал қилгани йўқ.
«Сурхон» раҳбарияти Владимир Бубаня билан фаол музокарага киришган. Муаммо ҳал қилинганидан кейингина ФИФА тақиқни олиши мумкин.
ФИФА тақиқини олиб ташламагунга қадар ПФЛ юқоридаги клублар футболчиларини рўйхатдан ўтказмайди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)