Буюк Британияда коронавирус оқибатида вафот этганлар сони 100 мингдан ошди. Европа давлатларидан ҳеч бирида ҳали бундай кўрсаткич қайд этилмаганди. Бу ҳақда 26 январь куни The Times газетаси хабар берди.
Буюк Британия бу кўрсаткич қайд этилган АҚШ, Бразилия, Ҳиндистон ва Мексикадан кейин бешинчи ўринда турибди. Ҳозир Буюк Британия ўлим даражаси энг юқори бўлган мамлакат ҳисобланади.
15 январь куни якунланган ҳафтада Миллий статистика идораси вирус қайд этилганларнинг 7776 нафари вафот этганини маълум қилди. Шу билан Британияда коронавирус оқибатида вафот этганлар сони 103 602 кишини ташкил этди.
Таъкидланишича, 2020 йил апрель ойида Буюк Британияда икки ҳафта ичида коронавирусдан 9 мингдан ортиқ ўлим қайд этилган, аммо ўлим сони 7 мингдан ошган бошқа ҳафталар бўлмаган.
Мамлакатда қайд этилган ҳар ўнта ўлимдан тўққизтасида COVID-19 сабаб сифатида қайд этилган. Ўлимнинг катта қисми катта ёшдаги гуруҳларда кузатилган – вирус билан ўлганларнинг деярли тўртдан уч қисми 75 ёшдан ошган. Ўлимнинг ҳар учтадан биттаси қариялар уйида қайд этилмоқда.
Маълумот учун, Буюк Британияда янги штамм сабаб учинчи маротаба локдаун эълон қилинган. Шундан сўнг Лондон мери коронавирус туфайли шаҳарда фавқулодда ҳолат эълон қилди. Лондонда коронавирусга чалиниш ҳолатлари кўпайиб, тиббиёт ходимлари етишмовчилиги кузатилаётгани боис полиция ва ўт ўчирувчилар тез тиббий ёрдам машиналарини ҳайдашга жалб қилинган.
Аввалроқ Британия ҳукумати ўзини ўзи изоляция қилган фуқароларга пул тўлаши мумкинлиги, Британияда коронавируснинг «бразилияча» штамми аниқлангани ҳамда коронавируснинг «британча» штамми 60 га яқин давлатда аниқлангани ҳақида хабар берилганди.
Изоҳ (0)