АҚШ Сенати молия вазири лавозимига Федерал захира тизимининг собиқ раҳбари Жанет Йелленнинг номзодини маъқуллади. Овоз бериш парламентнинг юқори палатаси веб-сайтида намойиш этилди, деб ёзмоқда «РБК».
100 нафар сенатордан 84 нафари Йелленга овоз берган. Сенаторларнинг кўпчилиги овоз берган тақдирда номзод тасдиқланган ҳисобланади. Шундай қилиб, Йеллен Молия вазирлигини бошқарган биринчи аёл бўлди.
Номзоди тасдиқланишидан бир неча кун олдин Йеллен Сенатнинг молия қўмитаси олдида сўзга чиққан. У агар маъқулланса, АҚШ санкциялар сиёсатини қайта кўриб чиқишини айтган. Унинг аниқлик киритишича, мазкур чекловлардан «стратегик мақсадларда ва тегишлича фойдаланилишини» таъминлаш учун ўз ўринбосаридан мамлакатнинг санкциялар сиёсатини ҳар томонлама кўриб чиқишни сўраган.
Шунингдек, у молия вазирининг ўринбосари терроризмга қарши кураш ва молиявий разведка фаолиятини текшириши тўғрисидаги Bloomberg хабарларини тасдиқлади. Молия вазирлигининг ушбу бўлими санкциялар учун жавобгардир.
2014 йилдан 2018 йилгача Йеллен АҚШ Федерал захира тизимини бошқарган. Ноябрь ойида унинг Молия вазирлиги раҳбари лавозимига номзоди кўрсатилганлиги маълум бўлганди.
Аввалроқ Сенат Миллий разведка директори этиб Байден томонидан номзоди қўйилган Аврил Хейнни ҳамда Пентагоннинг янги раҳбари этиб Ллойд Остинни тасдиқлаганди.
Изоҳ (0)