Қосим-Жўмарт Тўқаев коронавирус бўйича реал статистикани яширмасликни талаб қилди
Президент Қосим-Жўмарт Тўқаев коронавирус статистикасини яширган вилоятлар ҳақида сўзлади, деб хабар берди Tengrinews нашри.
«Пандемия пайтида тиббий статистика маълумотларининг ишончлилиги масаласи кескин кўтарилди. Бу тўғридан-тўғри беморларнинг тақдирига боғлиқ», – деди Тўқаев ҳукуматнинг кенгайтирилган йиғилишида.
Президентнинг таъкидлашича, барча ҳудудлар ва ёш гуруҳлари шароитида касалланишнинг ҳақиқий сурати бўйича статистик жиҳатдан ишончли ўрганишни ташкил этиш долзарб масала ҳисобланади.
«У бир ой ичида ўтказилиши ва вақти-вақти билан янгиланиб туриши керак. Бу, айниқса, мактаб ўқувчилари учун таълим режимини белгилашда, корхоналар ва фуқаролар учун карантин чекловларини жорий қилишда жуда муҳимдир», – деди президент.
Аввалроқ Қосим-Жўмарт Тўқаев Қозоғистон ҳудудини «Россиянинг совғаси» деб атаган Давлат думаси депутатига жавоб қайтаргани, Қозоғистон ўз фуқароларини 1 февралдан «Спутник V» вакцинаси билан эмлашни бошлагани ҳамда Қозоғистон ўлим жазосидан расман воз кечгани ҳақида хабар берилганди.
