Buyuk Britaniyada koronavirus oqibatida vafot etganlar soni 100 mingdan oshdi. Yevropa davlatlaridan hech birida hali bunday ko‘rsatkich qayd etilmagandi. Bu haqda 26-yanvar kuni The Times gazetasi xabar berdi.
Buyuk Britaniya bu ko‘rsatkich qayd etilgan AQSh, Braziliya, Hindiston va Meksikadan keyin beshinchi o‘rinda turibdi. Hozir Buyuk Britaniya o‘lim darajasi eng yuqori bo‘lgan mamlakat hisoblanadi.
15-yanvar kuni yakunlangan haftada Milliy statistika idorasi virus qayd etilganlarning 7776 nafari vafot etganini ma’lum qildi. Shu bilan Britaniyada koronavirus oqibatida vafot etganlar soni 103 602 kishini tashkil etdi.
Ta’kidlanishicha, 2020-yil aprel oyida Buyuk Britaniyada ikki hafta ichida koronavirusdan 9 mingdan ortiq o‘lim qayd etilgan, ammo o‘lim soni 7 mingdan oshgan boshqa haftalar bo‘lmagan.
Mamlakatda qayd etilgan har o‘nta o‘limdan to‘qqiztasida COVID-19 sabab sifatida qayd etilgan. O‘limning katta qismi katta yoshdagi guruhlarda kuzatilgan – virus bilan o‘lganlarning deyarli to‘rtdan uch qismi 75 yoshdan oshgan. O‘limning har uchtadan bittasi qariyalar uyida qayd etilmoqda.
Ma’lumot uchun, Buyuk Britaniyada yangi shtamm sabab uchinchi marotaba lokdaun e’lon qilingan. Shundan so‘ng London meri koronavirus tufayli shaharda favqulodda holat e’lon qildi. Londonda koronavirusga chalinish holatlari ko‘payib, tibbiyot xodimlari yetishmovchiligi kuzatilayotgani bois politsiya va o‘t o‘chiruvchilar tez tibbiy yordam mashinalarini haydashga jalb qilingan.
Avvalroq Britaniya hukumati o‘zini o‘zi izolyatsiya qilgan fuqarolarga pul to‘lashi mumkinligi, Britaniyada koronavirusning “braziliyacha” shtammi aniqlangani hamda koronavirusning “britancha” shtammi 60 ga yaqin davlatda aniqlangani haqida xabar berilgandi.
Izoh (0)