Қирғизистон собиқ бош вазири Муҳаммадкалий Абилгазиев ноқонуний йўллар билан бойлик орттирганликда гумонланиб ҳибсга олинди. Бу ҳақда «24.kg» хабар берган.
Агентлик хабарига кўра, собиқ амалдор 26 январь куни сўроққа чақирилган ва шу куннинг ўзида унга ноқонуний йўллар билан бойлик орттирганлиги юзасидан билдиришнома берилган. Бундан ташқари хабарда Абилгазиев Кумтор олтин конига оид ишга ҳам алоқадор бўлиши мумкинлиги тахмин қилинган.
Абилгазиев Қирғизистон ҳукуматини 2018 йилдан 2020 йил июнь ойига қадар бошқарган. Ўтган йили 15 июнда у ўз хоҳишига кўра истеъфо берган эди.
2020 йил октябрь ойидаги норозилик намойишлари вақтида давлат раҳбариятидаги барча амалдорлар ўз ваколатларини топшириши ва парламент сайловларидан кейин Абилгазиевга мамлакат ҳудудини тарк этиш тақиқлаб қўйилди.
Қирғизистон иқтисодий жиноятларга қарши курашиш давлат хизмати муайян иш юзасидан судга қадар суриштирув ишлари бошланишидан аввал собиқ мансабдорларга бу каби тақиқларнинг қўйилиши меъёрий ҳолат эканини маълум қилганди.
Аввал Қирғизистон Миллий хавфсизлик қўмитаси собиқ раҳбари Абдил Сегизбаев ҳибсга олингани хабар қилинганди.
Изоҳ (0)