Португалия ҳукумати мамлакатда аҳвол оғирлашаётгани сабабли COVID-19 пандемиясига қарши курашиш учун Европа Иттифоқидан ёрдам олиш имкониятларини ўрганиб чиқмоқда. Бу ҳақда Associated Press хабар берди.
Португалия соғлиқни сақлаш вазири Марта Темидонинг сўзларига кўра, беморларни Европанинг бошқа мамлакатларга юбориш — ЕИда кам учрайдиган ҳолат эмас. Аммо Португалиянинг мамлакатнинг географик жиҳатдан узоқда, яриморол чеккасида жойлашгани муаммога айланмоқда.
Вазирнинг таъкидлашича, пандемия даврида мамлакатдаги барча касалхоналар кучли босим остида қоляпти, тиббиёт ходимлари етишмайди. Шу сабабли ҳукумат ЕИга тиббиёт ходимларини юборишини сўраб мурожаат қилиши мумкин.
«Бизда бўш койкалар етарли. Бироқ тиббиёт персонали етишмаяпти, шу сабабли шошилинч тарзда ходимлар излаяпмиз», — деган Темидо.
Пандемия бошидан буён Португалияда COVID-19 билан касалланиш бўйича 643 мингдан ортиқ ҳолат қайд этилиб, касалланган беморларнинг 10 мингдан зиёди коронавирус асоратлари оқибатида вафот этган.
Аввал Португалияда маҳаллий вақт билан 24 январь 8:00 да (Тошкент вақти билан 13:00) президент сайловларида овоз бериш бошлангани, 25 январда эса мамлакатнинг амалдаги президенти Марселу Ребелу де Соуза сайловларда ғолиб бўлгани хабар қилинганди. Эслатиб ўтамиз, 12 январда Ребелу ди Созанинг коронавирус юқтириб олгани ҳақида хабар берилганди.
Изоҳ (0)