Россия президенти Владимир Путин Коррупцияга қарши кураш фонди (ККФ) суриштирувида тилга олинган Гелинжикдаги қасрга на у, на унинг қариндошлари эгалик қилишини билдирди. Бу ҳақда у 25 январь — Талабалар куни муносабати билан Россия олийгоҳлари талабалари билан учрашувда айтиб ўтди.
«Мен бу фильмни кўрганим йўқ, чунки бунақа маълумотни кўриб чиқиш учун шунчаки бўш вақтим йўқ. Лекин ёрдамчиларим олиб келган видеожамланмаларга кўз югуртириб чиқдим. Саволингизга бирдан жавоб бермоқчиман: у ерда менинг мулким сифатида кўрсатилган нарсаларнинг ҳеч бири на менга, на менинг яқин қариндошларимга тегишли эмас ва ҳеч қачон тегишли бўлмаган. Ҳеч қачон», — деди Владимир Путин.
Президент «қаср» мавзуси ўн йилдан ортиқ вақт давомида муҳокама қилинаётгани ва шунча йилдан буён ушбу мулк билан — ер участкаларининг расмийлаштирилиши, молиявий проводкалар билан боғлиқ ҳужжатлар қолган бўлиши кераклигини таъкидлади.
«Буларнинг ўрнига менинг суратимни, баттерфлай усулидаги сузишимни мен ҳеч қачон бормаган ва кўрмаган қанақадир бассейнга жойлаштиришган. Лекин мен шунақа сузганман. Енисейда 2016 йилда. Бу шунчаки қурамачилик, монтаж. Бизнинг машҳур персонажларимиздан бирининг тили билан айтганда: ‘Бу зерикарли, қизлар’. Ҳеч бўлмаса, биронта янги нарса ўйлаб топишса бўларди», — деди у.
Бир неча ойлик Германиядаги даволаниш ва қайта тикланишдан сўнг, 17 январь куни Алексей Навальний Россияга қайтиб келди. Қайтиб келиши билан уни Россия милицияси қўлга олди.
19 январда асосчиси мухолифатчи Алексей Навальний бўлган Коррупцияга қарши кураш фонди «Путин учун қурилган қаср» ҳақида катта тадқиқотни эълон қилди. YouTube тармоғига жойланган мазкур видео қисқа вақт ичида бир неча миллиондан ортиқ томоша қилинган ва катта шов-шувга сабаб бўлган. Алексей Навальний иддао қилишича, Россия президенти Геленжик яқинида, Қора денгиз соҳилида «бутун бошли қироллик»га эгалик қилади, унинг майдони «Монакодек 39 та князлик ҳудудига тенг». Фонд хабар беришича, мажмуанинг қурилишини бир қатор компаниялар, шу жумладан, «Роснефть» ва «Транснефть» давлат компаниялари қалбаки ижара тўловлари ва бошқа коррупциявий схемалар ёрдамида молиялаштирган. Тадқиқот муаллифлари бу схемани «дунёдаги энг катта пора» деб атаб, қаср ва узумзорларга сарфланган жами пул қийматини камида 100 миллиард рубль (1,35 миллиард доллар)га баҳоламоқда.
Алексей Навальний ҳибсга олинганидан кейин видеомурожаат йўллаб, ўз тарафдорларини намойишларга чиқишга даъват этган. Шундан сўнг, 23 январь куни Россиянинг ўнлаб шаҳарларида Алексей Навальнийни қўллаб-қувватлаб митинглар ўтказилди.
ОАВнинг хабар беришича, мазкур акция Россиядаги сўнгги ўн йиллардаги энг йирик намойиш бўлган. Акциялар чоғида бутун Россия бўйлаб 3352 киши қўлга олинган. Бундай маълумотларни 24 январь куни эрталаб «ОВД-Инфо» келтириб ўтди.
Норозилик акцияларини изоҳлар экан, Владимир Путин: «Барча одамлар сиёсий фаолият, ўз фикрини ифодалаш, ўз фикрини жамоатчилик онгига ҳавола этиш ҳуқуқига эга. Аммо қонун доирасида. Ҳуқуқ-тартибот органлари ҳам қонун доирасида ҳаракат қилиши керак», — деди.
Изоҳ (0)