Республика махсус комиссияси қарорига кўра, Ўзбекистонда 28 январдан концерт-томоша тадбирларини ташкил этишга рухсат берилди.
Қайд этилишича, сўнгги кундларда келиб тушган кўплаб маданият соҳа вакилларининг мурожаатларини инобатга олган ҳолда, шунингдек, аҳоли маданий хордиқ чиқаришлари учун қулай шароит яратиш мақсадида концерт-томоша тадбирларини 2021 йилнинг 28 январидан бошлаб санитария-эпидемиологик талабларга қатъий риоя этган ҳолда ташкил этишга рухсат берилди.
Республика махсус комиссиясининг қарори билан концерт ва томоша тадбирларини ўтказиш бўйича қуйидаги талаблар белгиланди:
- концерт саройларининг томошабин сиғимини инобатга олган ҳолда томошабинлар сонини 50 фоиздан оширмаган ҳолда ташкил этиш;
- концерт саройларининг томошабин ўриндиқларидан оралиқ масофани сақлаган ҳолда фойдаланилишини таъминлаш ва бу борада оралиқ масофани сақлаш учун талаб этиладиган ўриндиқларни консервация қилиш;
- концерт саройларига ташриф буюрувчи томошабин ҳамда хизмат кўрсатувчи ходимлар қатъий ниқобда бўлиш.
Республика махсус комиссияси халқимиздан коронавирус инфекциясини тарқалишини олдини олиш мақсадида санитария-эпидемиологик қоидаларга қатъи риоя этишлари ҳамда мамлакатимизда эпидемиологик барқарорликни таъминлаш борасида эришилган бугунги вазиятни бардавом бўлиши учун шахсий масъулиятни оширишларини сўраб қолади», — дейилади баёнотда.
Эслатиб ўтамиз, 2020 йил 15 мартдан бошлаб республика ҳудудида ўтказилиши режалаштирилган барча турдаги оммавий байрам тадбирлари, халқаро тадбирлар ва спорт мусобақалари, театр, кино ва концерт дастурлари вақтинча тўхтатилганди.
23 мартдан бошлаб тўй-маросимларнинг ўтказилиши ҳам бекор қилинган эди. Республика махсус комиссиясининг 30 майдаги қарори билан 30 кишидан ошмаган ҳамда санитария ва гигиена талабларига қатъий риоя этган ҳолд оилавий тантана, тўй, маърака ва маросимларни ўтказишга рухсат берилди.
Изоҳ (0)