Ўзбекистонда такси ҳайдовчиларини лицензия талаб қилинувчи фаолият турлари рўйхатидан чиқариш масаласи 2021 йилда ҳал этилиши мумкин. Бу ҳақда бандлик ва меҳнат муносабатлари вазири Нозим Ҳусанов АОКАда ўтказилган матбуот анжуманида маълум қилди.
Вазирнинг таъкидлашича, бу фаолият инсон ҳаёти ва саломатлиги билан боғлиқ ва дунёнинг аксар давлатларида лицензияланади.
2020 йил август ойидан ўзини ўзи банд қилиш тизими такомиллаштирилди. Бугунги кунга келиб, 67 турдаги фаолият билан шуғулланмоқчи бўлган фуқаролар онлайн тартибда Давлат солиқ қўмитаси сайтида рўйхатдан ўтиб, фаолият юритишлари мумкин.Бунинг афзал томони шундаки, фуқаро белгиланган йиллик тўловини тўласа, унга йиллик пенсия стажи қўшилиб боради. Ўтган йили бу базавий ҳисоблаш миқдорининг 50 фоиз (223 000 сўмнинг ярми, яъни 111 минг 500 сўм) миқдорида эди, бу йил бу рақам 1 баравари миқдорида белгиланди (1 февралдан 245 минг сўм).
Яъни фуқаро бир йилга 245 минг сўм тўласа, келгусида унга пенсия ҳисоблашда стажини инобатга олишга асос бўлади.
Ўзимга ҳам таксичилардан таксичиликни лицензия талаб қилинмайдиган фаолият турига киритайлик, деган таклифлар келиб туради.
Лекин бу борада хорижий давлатлар тажрибаси ўрганиб чиқилганида, уларнинг аксариятида бу фаолият лицензиялаштирилган. Таксичиларга қатор талаблар бор. Чунки бу масалада энг асосий жиҳат инсон ҳаёти ва саломатлиги билан боғлиқдир. Биз шу томонини эътиборга олишимиз керак.
Бу масалада кўплаб муҳокама-музокаралар олиб бориляпти. Ўйлайманки, 2021 йилда бу мавзуга ҳам ҳуқуқий ечим топилса керак.
Нозим Ҳусанов, бандлик ва меҳнат муносабатлари вазири
Меҳнат вазирининг биринчи ўринбосари Эркин Муҳиддинов такси ҳайдовчиларини лицензия талаб қилинувчи фаолият турлари рўйхатидан чиқариш масаласи меҳнат бозорига фойда бўлишини, бироқ йўловчиларнинг хавфсизлигини таъминлаш йўлида таксичиларнинг машинаси доимий кўрикдан ўтказилиб туриши ва ҳайдовчиларнинг ўзини ҳам соғлиғи назорат остида бўлиши масаласи борлигини таъкидлаб ўтган.
Мавзуга доир: Олий Мажлис депутатлари такси ҳайдовчиларидан лицензия талаб қилмаслик таклифини илгари сурди
2020 йил октябрь охирларида Президент Шавкат Мирзиёев «Яширин иқтисодиётни қисқартириш ва солиқ органлари фаолияти самарадорлигини ошириш бўйича ташкилий чора-тадбирлар тўғрисида»ги фармонни имзолагани тўғрисида хабар берилганди. Мазкур фармон лойиҳаси ва унинг имзоланган версияси таққосланганида, ундан бир нечта банд, жумладан, жисмоний шахсларга ўзини ўзи банд қилиш учун йўловчиларни ташишга рухсат бериш тўғрисидаги банд жой олмагани маълум бўлганди.
2020 йилнинг декабрь ойида бўлиб ўтган матбуот анжуманида Давлат солиқ қўмитаси раиси ўринбосари Фазлиддин Умаров киракашлик билан шуғулланаётганлар ўзини ўзи банд қилувчи сифатида рўйхатдан ўтса, аҳолининг хавфсизлигини таъминлаш билан боғлиқ масала юзага келишини айтган эди. Шунингдек, у бу масала бўйича махсус ишчи гуруҳи тузилгани ҳамда мақбул ечим изланаётганини айтган.
Изоҳ (0)