Тожикистон президенти Эмомали Раҳмон ўзининг парламентга анъанавий йиллик мурожаатида мамлакатда коронавирус йўқлигини маълум қилди, деб ёзади Asia-Plus.
«Бугун биз шукр қиламизки, январь бошидан буён мамлакатда коронавирусга чалиниш ҳолатлари йўқ, яъни мен ишонч билан айтаманки, Тожикистонда COVID-19 йўқ», — деди у.
Аммо президент бу бепарво бўлишимиз, эпидемик чораларни эътиборсиз қолдиришимиз керак дегани эмас, деди.
«Эпидемия чораларига риоя қилиш, гигиена воситалари, антисептиклар, тиббий ниқоблардан фойдаланиш зарурлигини таъкидлаб ўтаман, — деди президент. — Республика штаби масжидларнинг очилишига рухсат берди, лекин масжидга келувчилар, айниқса, жума намозлари чоғида белгилаб қўйилган чораларга риоя қилиши шарт. Агар у ёки бу масжидда эпидемик чораларга амал қилинмаса, уларни ёпишга тўғри келади».
Бундан ташқари, давлат раҳбари тиббиёт соҳаси ходимларига, тадбиркорларга ва бутун Тожикистон халқига миннатдорлик билдирди.
«Бундай оғир даврда сабр-тоқат қилиб, саросимага тушмаган, балки ўзаро жипслашган ва бир-бирига ҳурмат кўрсатган, шифокорлар ва уларнинг оилаларини қўллаб-қувватлаган, давлат билан ёнма-ён ишлаган барча фуқароларга энг чуқур эҳтиромимни билдираман. Тиббиёт муассасаларига ва аҳолининг камбағал қатламларига тиббий ускуналар, дорилар ва озиқ-овқат маҳсулотлари билан ёрдам қилган саховатли кишиларга ҳам», — деди мамлакат президенти.
Нашр эслатишича, 11 январдан буён мамлакатда бирорта ҳам коронавирусга чалиниш ҳолати қайд этилмаган.
Пандемия бошидан буён Тожикистонда 13 308 киши коронавирус билан касалланган, уларнинг 90 нафари вафот этган, 13 218 киши эса соғайган.
Изоҳ (0)