Португалия президенти ўз лавозимига қайта сайланди

Португалияда президент сайловлари бўлиб ўтди, унда мамлакатнинг амалдаги президенти Марселу Ребелу де Соуза ғолиб бўлди, деб ёзади «РБК».

Тошкент вақти билан 25 январь 07:30 ҳолатига овозларнинг 99,9 фоизи ҳисоблаб чиқилган эди. Де Соуза бу босқичда 60,7 фоиз овоз тўплаган. Иккинчи ўринда Социалистик партиядан номзод Ана Гомеш (12,9%), учинчи ўринда — ўта ўнг «Етар!» (Чега) партияси етакчиси Андре Вентура. Қолган номзодлар 5 фоиздан кам овоз тўплади.

Сайловга сайловчиларнинг 39,4 фоизи келган.

Сайлов якунлари маълум бўлгач, де Соуза нутқ сўзлаб, португалияликлар иложи борича тезроқ коронавирус пандемиясини енгишни, ишчи ўринларни ва даромадларни қайта тиклашни, ночорликка қарши курашишни, шунингдек, кучли ва ишончга лойиқ раҳбарият остидаги барқарор сиёсий тизимга эга бўлишни исташини айтди.

У пандемияга қарши курашни бугунги кундаги энг муҳим вазифа деб атади. «Биз соғлиқни сақлаш тузилмаларимизга жиддий босим ўтказаётган жараённи тўхтатиш, сўнг уни ортга қайтариш учун қўлимиздан келган барча нарсани қилишимиз керак», — дея қўшимча қилди президент.

Сайловлар Португалияда коронавирус билан боғлиқ вазият ёмонлашган бир пайтда бўлиб ўтди. Мамлакатда 15 январдан яна кучли карантин жорий қилинди, худди баҳордаги каби чоралар амалиётга киритилди. Чоралар ҳар 15 кунда қайта кўриб чиқилиши керак, аммо бош вазир Антониу Кошта улар бир ой амал қилиши мумкинлигини билдирди.

Аҳолиси 10 миллиондан кўп бўлган республикада жами 625 мингга яқин одам коронавирусга чалинган, 10,1 мингдан зиёд бемор вафот этган.

Сайлов арафасида мамлакатда касалланиш ҳолатлари, шунингдек, вирусдан ўлим бўйича суткалик антирекорд қайд этилганди. Шу муносабат билан Португалия сайловларнинг хавфсиз ўтказилишини кафолатлашга ҳаракат қилди.

Январь бошида де Соуза коронавирусга чалингани маълум бўлган эди.

Марселу Ребелу де Соуза юридик таълим олган, ҳуқуқшунос, сўнг журналист бўлиб ишлаган. 1974 йилда Социал-демократик партияга қўшилган. 1981 йилда вазирлар кенгаши давлат котиби бўлган, сўнг парламент билан ҳамкорлик масалалари бўйича вазир бўлган.

У 2016 йилдаги сайловларда ўз номзодини қўйиб, 52 фоиз натижа билан ғолиб чиққан.