АҚШда Трамп қароргоҳи яқинидаги аэропортга унинг номини бериш таклифи рад этилди

АҚШнинг Флорида штатидаги собиқ президент Дональд Трампнинг Мар-а-Лаго қароргоҳи жойлашган Палм-Бич округи комиссияси Палм-Бич аэропортини Трампнинг шарафига номлаш ташаббусини қўллаб-қувватламайди, деб ёзади «Коммерсантъ». Бу ҳақда комиссия аъзоларининг кўпчилиги South Florida Sun Sentinel газетасига маълум қилган.

Aerопортни қайта номлаш таклифи Республикачилар партиясининг Флоридадаги бўлинмаси раиси ўринбосаридан келиб тушган, у Сарасота округи комиссиясига киради. Палм-Бич округи комиссияси аъзоси Мелисса Маккинлей газетага маълум қилишича, Зиглер «бизнинг эмас, ўзининг округида қайта номлашлар билан шуғулланса яхши бўларди».

Нашр қайд этишича, одатда АҚШ президентлари истеъфоларидан кейин қонун чиқарувчилар топонимларни қайта номлаш ташаббуслари билан чиқади. Президентлик муддати тугаганидан кейин бундай таклиф билан чиққан ягона конгрессмен Флоридадан республикачи Энтони Сабатини бўлди. У Флоридадаги 27-федерал трассанинг бир қисмини Дональд Трамп шарафига номлашни таклиф қилди.

20 январь куни Трамп Жо Байденнинг инаугурациясидан олдин Оқ уйни тарк этиб, Флоридадаги қароргоҳига учиб кетди. Бунгача АҚШ Конгрессининг Вакиллар палатаси Трамп тарафдорларининг Конгресс биносига ҳужуми туфайли, унга импичмент эълон қилган эди. Трамп айбдор деб эълон қилинса, унинг давлат раҳбарлик лавозимларини эгаллаши тақиқланиши мумкин.

Аввалроқ америкалик сенаторлар февралда АҚШнинг собиқ президенти Дональд Трампнинг импичментига оид масалани кўриб чиқишга киришиши хабар берилганди.