АҚШнинг Калифорния штати Плэсер округида коронавирусга қарши эмланган фуқаро вафот этгани юзасидан ҳуқуқни муҳофаза қилиш органлари текширув бошлади. «РБК»нинг ёзишича, бу ҳақда маҳаллий округ бошқармасининг Facebook’даги саҳифасида маълум қилинган.
Хабарга кўра, вафот этган шахс коронавирус билан 2020 йил декабрь ойи охирида касалланган. Кейинчалик, 21 январь куни у COVID-19’га қарши эмланган ва орадан бир неча соат ўтиб вафот этган.
Бошқармада қайд этилишича, эмлаш округ тиббиёт ходимлари томонидан ўтказилмаган. Эмлашда қайси вакцинадан фойдаланилганига аниқлик киритилмаган
Терговда федерал хизматлар иштирок этмоқда. «Тергов тугагунга қадар ўлим сабаблари ҳақидаги ҳар қандай хабарлар шошқалоқликдир», — дейилади хабарда.
Эслатиб ўтамиз, АҚШда 14 декабрь куни коронавирусга қарши эмлаш бошланди. Биринчи навбатда касалланганлар билан ишлаётган тиббиёт ходимлари эмланмоқда. Касалликлар назорати ва профилактикаси марказлари (CDC) маълумотларига кўра, 2020 йил охиригача Америка ҳукумати 40 миллион кишини эмлашни режалаштирмоқда.
Июль ойида Pfizer АҚШ ҳукумати билан 50 миллион америкаликни эмлашга етадиган 100 миллион доза (бир кишига иккитадан инъекция) вакцина етказиб бериш учун 1,95 миллиард долларлик шартнома имзолаган. Шартнома дорининг клиник синовлари тугашидан олдинроқ тузилган, фармокологик гигант вакцина самарадорлиги исботланган тақдирдагина партияни етказиб бериши керак эди.
Ноябрь ойида Pfizer ва унинг германиялик шериги BioNTech томонидан ишлаб чиқилган вакцина 95 фоиз самарадорлик кўрсатди ва аввалроқ тузилган шартнома ишга солинди. Аммо NYT манбаларининг маълум қилишича, ишлаб чиқарувчилар шартномани имзолаш босқичидаёқ Оқ уйга яна 100 миллионта дозадан иборат қўшимча партияни сотиб олиш имкониятини кўриб чиқишни таклиф қилган. Президент маъмурияти эса бундан воз кечган.
Аввалроқ АҚШда Pfizer вакцинаси билан эмланган икки тиббиёт ходимининг аҳволи ёмонлашгани, синовлардаги 6 кўнгилли эса вафот этгани ҳақида хабар берилганди.
Изоҳ (0)