Бутун Россия бўйлаб Навальний тарафдорларининг акциялари чоғида 3 мингдан зиёд одам қўлга олинди

23 январь куни Россиянинг ўнлаб шаҳарларида Алексей Навальнийни қўллаб-қувватлаб митинглар ўтказилди. У «Новичок» гуруҳидаги заҳар билан заҳарланганидан кейин Германияга даволанишга кетган, Россияга қайтиб келганида эса дарҳол қўлга олиниб, 30 кунлик қамоққа маҳкум қилинган эди. Сиёсатчининг штаби акциялар арафасида уларнинг мамлакатдаги 93 та шаҳарда бўлиб ўтишини эълон қилганди. Митинглар чет элда — Австралия, Германия, Австрия, Чехия, Буюк Британия, АҚШ, Черногория ва бошқа мамлакатларда ҳам бўлиб ўтди.

Россия ҳукумати билан мувофиқлаштирилмаган бўлса-да, норозилик акцияси кўп йиллар ичидаги энг йириги бўлди, деб ёзади Meduza. Унда ўн минглаб одамлар қатнашди. Бошқа кўплаб митинглардан фарқли ўлароқ, Россия ҳудудларида минглаб одамлар кўчаларга чиқди.

23 январь кунги акциялар чоғида бутун Россия бўйлаб 3352 киши қўлга олинган. Бундай маълумотларни 24 январь куни эрталаб «ОВД-Инфо» келтириб ўтди.

Хусусан, Москвада 1331, Санкт-Петербургда 501 киши, шунингдек, Новосибирск, Воронеж, Қозон шаҳарларининг ҳар бирида 90 дан зиёд одам қўлга олинган. Уларнинг кўпчилигига нисбатан акцияларда қатнашиш қоидаларини бузганлик ва шаҳар инфратузилмасига халақит берганлик ҳақидаги маъмурий моддалар илгари сурилмоқда.

Қайд этилишича, қўлга олинганларнинг умумий сони Россия замонавий тарихидаги норозилик намойишлари тарихида рекорд ҳисобланади. Бунгача рекорд сонли одамлар мамлакатда 2017 йил 12 июнда қўлга олинган эди — 1769 киши.

Москвада эса рекорд сонли қўлга олишлар 2019 йил 27 июль куни Москва шаҳар думасига сайловларга мустақил номзодларнинг киритилишини ёқлаб ўтказилган акцияда бўлган, ўшанда 1372 киши қўлга олинган эди.

Митинглар чоғида кўплаб журналистлар жабрланди. Журналистлар мустақил касаба уюшмаси журналистларнинг касбий фаолиятига тўсқинлик қилиш билан боғлиқ 52 та ҳолатни қайд этди.

Митинглар якунларига кўра аллақачон жиноий ишлар қўзғатилди. Улар ўндан ортиқ бўлиб, ҳуқуқ-тартибот органлари ходимларига нисбатан зўравонлик, оммавий тартибсизликларга даъватлар, мол-мулкка қасддан зарар етказиш ва безорилик ҳақидадир.

Навальнийнинг тарафдорлари бир ҳафтадан кейин яна акциялар ўтказиш ниятини билдирди.

АҚШ Давлат департаменти Россиянинг сиёсатчи Алексей Навальнийни қўллаб-қувватлаб ўтказилган акцияларни бостириш чоғидаги хатти-ҳаракатларини қоралади. Буюк Британия ташқи ишлар вазири Доминик Рааб ҳам шунга ўхшаш баёнот билан чиқиш қилди. Иккала томон ҳам Россияни халқаро келишувларга риоя қилишга ва норозиликлар пайтида қўлга олинганларни озод этишга чақирди.