АҚШ Миллий гвардиясининг 7 минг нафаргача ҳарбий хизматчиси АҚШ пойтахтида март ўрталаригача қолади. Бу ҳақда Миллий гвардия қўмондони АҚШ (қуруқликдаги қўшинлар) армияси генерали Дениел Хокансон маълум қилди, деб ёзади «РБК».
Унинг сўзларига кўра, ҳарбий хизматчилар тартибсизликлар хавфи туфайли федерал ҳуқуқ-тартибот органларига ёрдам бериш учун Вашингтонда қолади. Уларнинг сони маҳаллий ҳуқуқ-тартибот органлари сўровларидан келиб чиқиб ўзгариши мумкин, деди у. Ушбу ҳарбий хизматчилар қуролланган бўлиш-бўлмаслиги масаласини эса федерал ҳуқуқ-тартибот органлари ҳал қилиши керак, дея қўшимча қилди Миллий гвардия қўмондони.
Собиқ президент Дональд Трамп тарафдорларининг Капитолийга ҳужумидан кейин сайланган президент Жо Байденнинг инаугурацияси муносабати билан тартибни таъминлаш учун Вашингтонга 25 мингга яқин ҳарбий хизматчи етиб келган эди. Улар шаҳар бўйлаб жойлаштирилди, баъзилари қуролланган эди.
Байденнинг инаугурацияси 20 январь куни ҳеч қандай ҳодисаларсиз ўтди. Кейинроқ ОАВлар тадбирда қўриқчилик қилган Миллий гвардиянинг 100 га яқин жангчилари коронавирусга топширган тестлари мусбат натижа бергани ҳақида ёзди. Хокансон 25 минг ҳарбий хизматчиларнинг 200 га яқини COVID-19 юқтириб олганини тасдиқлади.
Мавзуга доир:
- Вашингтонга инаугурация чоғида тартибни таъминлаш учун 25 минг нафар Миллий гвардия ҳарбийлари етиб келди
- Фото: Трамп импичментини муҳокама қилиш чоғида Конгрессни қўриқлаш учун келган аскарлар ухламоқда
- Капитолий атрофидаги тиканли сим ва шаҳардаги минглаб аскарлар: Вашингтон Жо Байденнинг инаугурациясига қандай тайёргарлик кўрмоқда? (фото)
Изоҳ (0)