Microsoft корпорацияси General Motors концернининг ҳайдовчисиз бошқариладиган автомобилларни яратишга мўлжалланган Cruise шўъба компаниясига 2 миллиард доллар сармоя киритди, деб хабар беради Esquire.
Ҳамкорлик доирасида Cruise Azure — Microsoft’нинг «булутли» платформасидан фойдаланади. Microsoft сайтида эълон қилинган пресс-релизга кўра, платформа «ҳайдовчисиз бошқариладиган транспорт воситаларининг тижоратлашувини тезлаштириш»га ёрдам бериши керак.
«Cruise ва GM компаниялари Microsoft билан узоқ йиллик стратегик битим имзолади. У ҳайдовчисиз бошқариладиган транспорт воситаларининг тижоратлашувини тезлаштиришга, уни хавфсиз, тоза ва барча учун ҳамёнбоп транспортга айлантириш учун хизмат қилади», — дейилади Microsoft’нинг Twitter’даги аккаунтида.
Таъкидланишича, Microsoft Cruise билан ҳамкорликдан «келажакда транспорт соҳасини кенгайтириш» мақсадида фойдаланади.
«Рақамли технологиялар соҳасидаги ютуқларимиз ҳаётимизнинг барча жабҳаларини ўзгартириб юбормоқда, жумладан, одамларни ташиш ва товарларни етказишни ҳам. Cruise ва GM ‘булутли’ платформадан фойдаланмоқчи экан, биз компаниялар кенгайиши ва ҳайдовчисиз бошқариладиган автомобиллардан фойдаланишни оммалаштириш учун Azure’ни тақдим этамиз», — дейди Microsoft бош директори Сатья Наделла.
Microsoft’дан ташқари Cruise’га Honda ва бошқа инвесторлар ҳам сармоя киритган бўлиб, у компания қийматининг 30 миллиард долларга баҳоланишига хизмат қилган.
Эслатиб ўтамиз, 2019 йилда General Motors компанияси Мичигандаги заводида Cruise АV ўзиюрар автомобилининг ишлаб чиқариладиган версиясини яратишга тайёргарлик доирасида икки ишлаб чиқариш объекти модернизациясига 100 миллион доллардан ортиқ инвестиция киритганди.
Изоҳ (0)