Мўғулистон бош вазири Ухнаагийн Хурэлсух туққанига кўп вақт бўлмаган, коронавирус билан касалланган аёлни иссиқ кийимларсиз бошқа шифохонага кўчирилгани боис бўлиб ўтган норозиликлардан сўнг истеъфо берди. Бу ҳақда «РБК» хабар қилмоқда.
«Ёшларнинг ҳукуматга норозилик билдириш учун кўчаларга чиққани тўғри. Давлат ҳаммани кўрадиган ва тинглайдиган бўлиши керак. Шунинг учун халқ ҳукуматга сўзини айтди ва бош вазирдан адолат ҳамда жавобгарликни талаб қилди», – деди бош вазир.
Бундан аввал бош вазир ўринбосари, Коронавирусга қарши кураш бўйича давлат фавқулодда комиссияси раҳбари Янгугийн Содбаатар ва Соғлиқни сақлаш вазирлиги раҳбари Тоғтолин Мунхсайхан ҳам истеъфога чиқишини эълон қилган.
Гап шундаки, 19 январь куни ижтимоий тармоқларда бир неча соат олдин туққан аёл ва унинг чақалоғи туғруқхонадан иссиқ кийим, пойабзал ва шахсий ҳимоя воситаларисиз юқумли касалликлар шифохонасига ўтказилгани акс этган видео пайдо бўлган.
Ушбу видео жамоатчиликнинг норозилигига сабаб бўлди. Шундан сўнг Улан-Батор марказида норозилик ҳаракати бўлиб ўтди.
Мўғулистон Соғлиқни сақлаш вазирлигининг сўнгги маълумотларига кўра, мамлакатда 1584 нафар кишида коронавирус инфекциясини юқтириш ҳолатлари аниқланган бўлиб, беморларнинг 1046 нафари соғайиб кетган.
Аввалроқ Қирғизистон ҳукумати Жапаровнинг президент сайловларидаги ғалабасидан сўнг истеъфога чиққани, Нидерландия ҳукумати болалар нафақаси билан боғлиқ можаро фонида ҳамда Эстония бош вазири коррупция можароси фонида истеъфо бергани ҳақида хабар берилганди.
Изоҳ (0)