Россия Байрут портидаги портлаш бўйича қидирувга берилган икки россияликни Ливанга экстрадиция қилишни рад этди
Интерпол Байрут портидаги портлаш бўйича 2 нафар россияликка қидирув эълон қилганди. Россия ушбу икки россияликни ҳибсга олмайди ва бошқа давлатга экстрадиция қилмайди. Бу ҳақда Россия Бош прокуратурасига таяниб, «РИА Новости» хабар қилди.
Гап селитра етказиб берилган кема капитани Борис Прокошев ҳамда кеманинг хўжайини Игор Гречушкин ҳақида бормоқда.
«Гречушкин ва Прокошевга нисбатан экстрадиция қилиш ва ҳуқуқий ёрдам бериш тўғрисида хорижий давлатларнинг ваколатли органларидан ҳеч қандай сўровлар бўлмаган. Гречушкин ва Прокошев Россия фуқаролари эканлигини ҳисобга олсак, уларни бошқа давлатга топшириш мумкин эмас», – дейилади Бош прокуратура хабарида.
Ливан Бош прокуратураси Прокошев ва Гречушкинни халқаро қидирув тўғрисида Интерполга мурожаат қилган. Гречушкин ва Прокошев 2020 йил октябридаёқ Ливанда сиртдан ҳибсга олинган эди.
Прокошев ва Гречушкинга нисбатан Интерполнинг «қизил хабарномаси» амалда. Бу шуни англатадики, Интерполга аъзо давлатлар қидирувга киришишлари шарт эмас, аммо қидирувда бўлган шахсларнинг қаердалиги маълум бўлса, улар ҳибсга олиниши керак.
Эслатиб ўтамиз, Ливан пойтахти Байрут шаҳридаги портда 2020 йилнинг 4 август куни аммиак селитраси сақланаётган омбор портлаганди. Портлаш кучи шу даражада бўлдики, унинг оқибатида бутун шаҳардаги бинолар зарар кўрди, 190 киши ҳалок бўлди, 300 мингдан ортиқ одам уйсиз қолди.
Мамлакат расмийлари портлаш оқибатида юзага келган умумий зарарни 3-5 миллиард долларга баҳолади. Ҳодиса сабабли мамлакат ҳукумати истеъфога чиқди. Портлашга олти йил аввал божхона хизмати томонидан мусодара қилинган ва портдаги омборда сақланаётган 2750 тонна аммиак селитраси сабаб бўлган.
