Бухоро бошқа вилоятлардаги ривожланишдан 10 йил орқада қоляпти, коррупция, порахўрлик барҳам топмаяпти. Бу ҳақда Шавкат Мирзиёев Халқ депутатлари Бухоро вилояти кенгашининг 22 январь, жума куни ўтказилган навбатдан ташқари сессиясида айтиб ўтди. Президент матбуот хизматининг хабар беришича, сессияда давлат раҳбари ҳудудни ижтимоий-иқтисодий ривожлантириш вазифаларига тўхталди.
«Бухоронинг бугунги ривожи маъқулми, деган саволга менинг жавобим: йўқ. Бошқа вилоятлардаги ривожланишдан 10 йил орқада қоляпти. Коррупция, порахўрлик барҳам топмаяпти. Ялпи ҳудудий маҳсулотда қишлоқ хўжалиги улуши 50 фоиз экани эски замондан нишон. Саноат, хизмат кўрсатиш, тадбиркорлик бўйича вилоятнинг имкониятлари жуда кенг. Туман ҳокимлари, сектор раҳбарларининг дунёқараши ўзгариши керак», — деган Президент.
Қайд этилишича, мавжуд 544 та маҳалланинг ҳар бири ўрганилиб, 333 таси «қониқарли», 182 таси «ўрта» ва 29 таси «паст» ривожланиш тоифаларига ажратилди. Аҳолига даромад манбайи яратиш захиралари аниқланган.
Шунингдек, жойлардаги муаммо ва имкониятларни маҳалла даражасида ўрганиш, аҳоли бандлиги ва даромадини таъминлаш, тадбиркорликни ривожлантириш бўйича янги иш тизими жорий этилиши кераклигини таъкидлаган.
«Энди жамиятимизда бошқача йўналиш бўлади — маҳалла катта кучга айланади. Агар маҳалла раиси билимли, фидойи бўлса, кайфият ҳам, иқтисодиёт ҳам ўзгаради», — деган давлат раҳбари. Шу мақсадда вилоятга ишчи гуруҳ юборилган, шаҳар ва туманларга вазирлик, идора ва тижорат банклари раҳбарлари бириктирилди.
Хабарда айтилишича, давлат раҳбари ишсизлик муаммосига алоҳида тўхталди. Янги иш ўринлари очиш ва ўз-ўзини банд қилувчиларга шароит яратиш бўйича кўрсатмалар берилди. Оилавий тадбиркорлик, ёшлар бизнес лойиҳаларига 390 миллиард сўм имтиёзли кредитлар ажратилиши белгиланди. Ҳар бир туманда биттадан касб-ҳунар мактаби танлаб олиниб, унинг базасида мономарказлар ташкил этилади, маҳаллабай ўрганиш натижаси ўлароқ ишсизлар, ёшлар ва аёллар талаб юқори касбларга ўргатилади.
Бухоро вилоятида 2021—2022 йиллар учун умумий қиймати қарийб 19 триллион сўм бўлган 713 та инвестиция лойиҳаси шакллантирилган. Шундан 555 таси бу йил амалга оширилиши, 14 мингдан зиёд янги иш ўрни яратилиши режалаштирилган.
Хизмат кўрсатиш соҳаси салоҳиятини тўлиқ ишга солиш, жумаладан, зиёрат туризмини яна-да ривожлантириш зарурлиги таъкидланди. Жумладан, қадимий «Ғиждувон қўрғони»ни қайта тиклаб, очиқ осмон остидаги музей барпо этиш, Вобкент туманида «Ширин» қишлоғини этнотуризм масканига айлантириш, Пешку туманининг Афшона қишлоғида «Ибн Сино замонаси» мажмуасини ташкил этиш бўйича топшириқлар берилди. Бухоро зардўзлиги ва заргарлиги халқаро фестивалини ўтказиш ташаббуси илгари сурилди.
Ижтимоий соҳаларни ривожлантириш, янги таълим ва тиббиёт муассасалари ташкил этиш масалаларига ҳам эътибор қаратилди. 2021 йилда Бухорода Президент мактаби фаолият бошлайди. Математика, ахборот технологиялари, кимё-биология ва физикага ихтисослашган 16 та мактаб ташкил этилади. Шунингдек, 18 та мактабни реконструкция қилиш белгиланган.
Бундан аввал Халқ депутатлари Бухоро вилояти кенгашининг 22 январь куни бўлиб ўтган навбатдан ташқари 25-сессиясида номзоди Президент томонидан тавсия қилинган Ботир Зарипов Бухоро вилояти ҳокими лавозимига тасдиқлангани ҳақида хабар берилган эди.
Эслатиб ўтамиз, Шавкат Мирзиёев ҳудудлар ривожи, аҳоли ҳаёти билан яқиндан танишиш мақсадида 21 январдан буён Бухоро вилоятида бўлиб турибди. Ташриф давомида Президент тўртта туман фаоллари билан учрашди, «Бухоро Варнет» агросаноат мажмуасини бориб кўрди, Bukhara Cоттон Textile корхонаси фаолияти билан танишди.
Изоҳ (0)