Namanganda ukasi o‘zganing mashinasini o‘g‘irlab qochganini ko‘rgan aka bu haqda hudud profilaktika inspektoriga ma’lum qildi, deb xabar beradi Tergov departamenti.

Foto: Tergov departamenti

Ma’lumotlarga ko‘ra, 10-yanvar, yakshanba kuni soat 18:30 larda Yangiqo‘rg‘on tumani “Beshbuloq” mahallasida 30 yoshli fuqaro o‘ziga tegishli Nexia-2 rusumli avtomobili oynasini ochiq holda, xonadoni oldida qoldirgan. Bundan foydalangan noma’lum shaxs qonunga xilof ravishda ushbu avtomashinani boshqarib, qochib ketgan.

Olib borilgan tezkor qidiruv tadbirlari natijasida, mazkur Nexia-2 mashinasi 41 yoshli Y.M. ismli fuqaro tomonidan olib qochilganligi aniqlangan. U mast holda avtomobilni boshqarib, o‘zining yashash manziliga olib borib qo‘yganini ko‘rgan Y.M.ning akasi bu haqda darhol hudud profilaktika inspektoriga ma’lum qilgan.

Mazkur holat yuzasidan Yangiqo‘rg‘on tumani IIB huzuridagi Tergov bo‘limi tomonidan Y.M.ga nisbatan Jinoyat kodeksining 267-moddasi 1-qismi (transport vositasini olib qochish) bilan jinoyat ishi qo‘zg‘atilgan.

Hozirda tergov harakatlari davom etmoqda.

Avvalroq Farg‘onada 31 yoshli erkak o‘zganing telefonini o‘g‘irlab qochgani va IIBga o‘g‘irlangan telefon qayerdaligini uning xotini aytib bergani to‘g‘risida xabar berilgandi.