AQSh prezidenti Donald Tramp 2020-yil oxiriga qadar xorijlik mutaxassislar va ularning oila a’zolariga, shuningdek, mavsumiy ishchilarga ishchi vizasi berilishini to‘xtatib qo‘ydi. Tegishli hujjat Oq uy saytida e’lon qilingan.

Foto: The White House

“Vaqtinchalik ishchilarga ko‘pincha ularning turmush o‘rtoqlari va farzandlari hamrohlik qiladi, shuningdek, ularning ko‘pchiligi amerikalik ishchilarga raqobatchi. Odatdagi sharoitda vaqtincha ishga joylashtirish borasidagi dastur to‘g‘ri tashkil etilsa, iqtisodiyotga foyda keltirish mumkin. Biroq koronavirus sababli yuzaga kelgan iqtisodiy pasayish kabi favqulodda holatda ayrim immigratsion bo‘lmagan viza dasturlari amerikalik ishchilarning bandligiga g‘ayrioddiy xavfni yuzaga keltiradi”, — deydi Tramp.

AQSh prezidenti tomonidan imzolangan farmon H-1B, H-2B, H-4, L-1 vizalari va J-1 vizasining ba’zi turlariga taalluqli bo‘ladi.

H-1B vizalari xorijlik malakali ishchilar uchun, asosan, texnologiya sohasida keng qo‘llanadi. H-2B vizalari mavsumiy ishchilarga qo‘llanadi. H-4 vizalari esa H-1B vizalari egalarining turmush o‘rtoqlariga beriladi.

J-1 vizalari olimlar, tadqiqotchilarga; L-1 vizalari esa kompaniyaning xorijdagi bo‘limidan AQShdagi bo‘limiga ko‘chirilib o‘tkaziluvchilarga beriladi.

Tramp administratsiyasining yuqori martabali amaldorlaridan birining so‘zlariga ko‘ra, qabul qilingan choralar amerikaliklar uchun 50 mingta ish o‘rnini bo‘shatib beradi.

Eslatib o‘tamiz, mart oyining o‘rtalarida AQShda COVID-19 koronavirusining tarqalishi sabab Yevropa mamlakatlaridan keluvchilar uchun 30 kunga vaqtinchalik taqiq o‘rnatilgan edi. Aprel oyining oxirlarida esa Tramp immigrantlarning AQShga kirishi ikki oyga to‘xtatilganini ma’lum qilgan edi.